AZƏRBAYCANLI VƏ ÇİNLİ GƏNCLƏR ARASINDA ƏLAQƏLƏR GENİŞLƏNİR
Xəbər verdiyimiz kimi, Ümumçin Gənclər Federasiyasının nümayəndələri Azərbaycan Gənclər, İdman və Turizm Nazirliyinin dəvəti ilə Bakıdadırlar.
Gənclər, idman və turizm nazirinin müavini İntiqam Babayev AZƏRTAC-ın müxbirinə demişdir ki, nazirliklə Ümumçin Gənclər Federasiyası arasında əməkdaşlıq 1999-cu ildən mövcuddur. Ötən 4 il ərzində gənclərdən ibarət nümayəndə heyətləri qarşılıqlı səfərlər ediblər. Bu səfərlərdən əsas məqsəd gənclər siyasətinin həyata keçirilməsi ilə bağlı fikir və təcrübə mübadiləsi etməklə düzgün təbliğat işi qurmaqdır. Digər tərəfdən belə səfərlər zamanı çinli gənclərə, eləcə də dünya ictimaiyyətinə Azərbaycanla bağlı dolğun məlumatlar verilir. Çinli gənclərin Azərbaycana səfərlərinin nəticəsi olaraq BMT TŞ-nin daimi üzvlərindən biri olan Çin dövləti ölkəmizlə, xüsusən də Dağlıq Qarabağla bağlı obyektiv mövqe nümayiş etdirmişlər. Bundan başqa, çinli gənc iş adamı üçün şərait yaradılması nəzərdə tutulub. İstəyirik ki, ölkə iqtisadiyyatının müxtəlif sahələrinə gənc çinli iş adamlarını cəlb edək.
Bu günlərdə Bakıda çinli məktəblilərin rəsm və foto əsərlərinin sərgisi təşkil edilmişdir. Hazırda azərbaycanlı məktəblilərin çəkdikləri rəsm və fotoşəkillərin Çində sərgisinin açılması istiqamətində işlər gedir.
Bölmənin digər xəbərləri
