Azərin Əsgərli: Rəssamlıq mənim üçün dünyanı anlamağın ən yaxşı yoludur
Samux, 4 dekabr, Vüsalə Cənnətova, AZƏRTAC
Gənclik axtarışların, yeniliyin, özünü tapmağın çağırış dolu illəridir. Bu illərdə hər bir gənc özünü ifadə etməyin, hədəflər müəyyənləşdirib, onlara çatmağın yollarını axtarır. Kimisi musiqiyə meyil salır, kimisi ədəbiyyata, kimisi sözün, kimisi isə rənglərin və təsvirlərin sehrinə. On doqquz yaşlı Azərin Əsgərli də öz həyat yolunu rəssamlıq sənəti ilə birləşdirib.
AZƏRTAC-ın bölgə müxbiri Azərinlə görüşüb, gənc rəssamın yaradıcılığı, nailiyyətləri və gələcək planları barədə söhbətləşib.
Deyir ki, onun üçün rəssamlığa könül vermək dünyanı anlamağın və öz dünyasını ifadə etməyin ən yaxşı yoludur. Əl işləri həm sirdaşıdır, həm də hisslərini, fikirlərini, xəyallarını çəkinmədən sərgilədiyi vasitədir. Azərin Əsgərli 2006-ci ildə Samux rayonunun Kolayır kəndində anadan olub. 9 yaşından qələmi, fırçanı əlinə alaraq rəsmlər çəkməyə başlayıb. Orta məktəblə paralel rəssamlıq kursunda təhsil olan Azərin hazırda Azərbaycan Dövlət Mədəniyyət və İncəsənət Universitetinin Rəssamlıq fakültəsinin qrafika ixtisası üzrə II kurs tələbəsidir.
“Uşaq yaşlarımdan rəsmlər çəkirdim və anlayırdım ki, mən rəngli qələmlərlə, fərqli cizgilərlə, xəyalımdakı təsvirləri kağızlara köçürməklə xoşbəxt oluram. Əl işlərim məktəbimizdə, Samuxla yanaşı, bir sıra şəhər və rayonlarda keçirilən sərgilərdə nümayiş etdirilib. 2023-cü ildə rayonumuzda Ulu Öndər Heydər Əliyevin anadan olmasının 100 illiyinə həsr olunan rəsm müsabiqəsində I yerin sahibi olmuşam. Həmin il Uşaq İncəsənət Festivalının final mərhələsinədək irəliləmişəm”, - deyə Azərin bildirir.
O, rəsmlərində gəncliyin enerjisi, axtarışları, bəzən də sükutunun hiss olunduğunu söyləyir. “Akvarel su ilə həll olunan boyalardan istifadə edilən rəsm texnikasıdır, incə, şəffaf və işıqlı effekt yaratmaq qabiliyyəti ilə seçilir. Yağlı boya ilə çəkilən əl işi isə rənglərin zənginliyi və uzunömürlülüyü ilə fərqlənir. Mən hər ikisindən istifadə edirəm. Mavi rəngi çox sevirəm. Hər səmaya baxanda orada bir əsər görürəm. Realizmin dəqiqliyini, abstraksiyanın azadlığını sevirəm”, - deyən gənc qız bildirir ki, yaxşı rəssam olmaq üçün daim biliklərini artırmaq, bacarığını təkmilləşdirmək, özünü inkişaf etdirmək lazımdır. Hər yeni texnika, hər yeni baxış onun yaradıcılığını daha da zənginləşdirməlidir.
“Bir sıra tanınmış rəssamların yaradıcılığı məni ilhamlandırır. Ali məktəbi bitirdikdən sonra təhsilimi İtaliyada davam etdirmək, bu sənətə mükəmməl yiyələnmək arzusundayam. İstəyirəm ki, əl işlərim Azərbaycanımızda və dünyada keçirilən sərgilərdə nümayiş etdirilsin, ölkəmi sənətimlə tanıtmaq imkanım olsun”, - deyə Azərin arzusunu dilə gətirir. Gənc rəssamın qarşısına qoyduğu bu hədəfə çatması və Azərbaycan incəsənətini beynəlxalq səviyyədə təmsil etməsi üçün ona uğurlar arzulayırıq.
Bölmənin digər xəbərləri
