AZƏRTAC İLƏ LATVİYANIN LETA AGENTLİYİ ARASINDA ƏMƏKDAŞLIQ HAQQINDA SAZİŞ İMZALANMIŞDIR
Azərbaycan Dövlət Teleqraf Agentliyi - AZƏRTAC ilə Latviya Respublikasının LETA infomasiya agentliyi arasında əməkdaşlıq haqqında saziş imzalanmışdır. Sənədi AZƏRTAC-ın baş direktoru Aslan Aslanov və LETA-nın idarə heyətinin sədri Martins Barkans imzalamışlar.
Sazişə əsasən, tərəflər bir-birinin yazılı və fotoinformasiyalarından pulsuz istifadə etmək imkanı əldə edirlər.
Tərəflər nəşr, təlim, texniki məsələlər, informasiya texnologiyası, marketinq və satışlar sahəsində təcrübə mübadiləsi aparmağa dair razılığa gəlmişlər. Agentliklər bir-birinin qarşılıqlı səfər edən müxbirlərinə lazımi kömək etməyi də öhdələrinə götürmüşlər.
Xatırladaq ki, son illər Azərbaycan ilə Latviya arasında əlaqələr getdikcə genişlənir. 2005-cı ildə Latviya Prezidentinin Bakıya, 2006-cı ildə Azərbaycan Prezidentinin Riqaya səfərləri çərçivəsində müxtəlif sahələrdə əməkdaşlığa dair mühüm sənədlər imzalanmışdır. Bakıda və Riqada biznes forumları keçirilmiş, iş adamlarının qarşılıqlı səfərləri təşkil olunmuşdur. İki ölkə arasında ticarət dövriyyəsinin həcmi də xeyli artmışdır.
Bölmənin digər xəbərləri
