“AZKOMPOZİT” BORU ZAVODU REGİONDA VƏ DÜNYADA ANALOQU OLMAYAN MÜƏSSİSƏDİR
Dekabrın 29-da Sumqayıt şəhərində “Azkompozit” boru istehsalı zavodu istifadəyə verilmişdir.
Azərbaycan Prezidenti İlham Əliyev bu münasibətlə zavoda gəldi. Müəssisənin kollektivi dövlətimizin başçısını hörmət və ehtiramla qarşıladı.
Məlumat verildi ki, keçmişdə evtikmə kombinatının yerləşdiyi bu ərazi investisiya müsabiqəsinin qalibi olmuş “Sumqayıtsənayeistehsalızavodu” Səhmdar Cəmiyyəti tərəfindən özəlləşdirilmişdir. Cari ilin ikinci yarısından başlayaraq burada 15 milyon manatlıq əsaslı təmir-tikinti, yenidənqurma işləri görülmüşdür. Hazırda burada komponent maddələrdən gündə 500 metr boru istehsal edilir. Gələcəkdə bu rəqəm 1000 metrə çatdırılacaqdır. 150 nəfərin çalışdığı müəssisə genişləndirildikdən sonra işçilərin sayı 500-ə çatdırılacaq ki, bu da işsizliyin aradan qaldırılması baxımından çox mühümdür. İlkin mərhələdə boru istehsal olunur, gələcəkdə irihəcmli su, neft çənləri də buraxılacaqdır. Boruların daşınması, müvafiq məntəqələrə çatdırılması üçün Rusiya Federasiyasından 25 ədəd “KamAZ” markalı yük maşınları alınmışdır. Zavodda İtaliya, İngiltərə və Fransadan gətirilmiş müasir avadanlıq quraşdırılmışdır. Məsləhətçilər və mütəxəssislər Böyük Britaniya, Hindistan, Çin nümayəndələri və yerli vətəndaşlardır. Oğuz-Qəbələ-Bakı su kəmərinin, şəhərlərin daxili su və kanalizasiya xətlərinin çəkilişində bu məhsuldan istifadə ediləcəkdir. Yerli tələbat ödənildikdən sonra xarici bazara da məhsul çıxarılacaqdır. Üçnövbəli iş rejimində işləyənlərin əmək haqları 250-300 dollar həddindədir.
Bildirildi ki, hazırda 2000 millimetrlik borular hazırlansa da, gələcəkdə diametri 300 millimetrdən 2000 millimetrədək olan məhsul istehsal ediləcəkdir. Uzunömürlülüyü, korroziyaya və 25-30 atmosfer təzyiqinə davam gətirməsi, çəkisinin yüngüllüyü ilə fərqlənən bu cür boruların maya dəyəri ucuzdur. Əsas xammal İngiltərə, Çin və Birləşmiş Ərəb Əmirliklərindən gətirilir, gələcəkdə yerli xammaldan istifadə olunması nəzərdə tutulur. Qafqazda yeganə olan bu zavod gələcəkdə istehsal gücünə görə dünyada ən böyük müəssisə olacaqdır. Hazırda Çin və Böyük Britaniyada belə borular istehsal olunsa da, onlar 10-12 atmosfer təzyiqinə davam gətirir.
Prezident İlham Əliyev müəssisənin ayrı-ayrı istehsal sahələrini, o cümlədən baş korpusu və sınaq sexlərini gəzdi, müasir avadanlığa, şüşə liflər anbarına, kompressor stansiyasına, mexaniki təmir sahəsinə baxdı. Dövlətimizin başçısı boruların hazırlanması texnologiyası və prosesini də yaxından izləyərək dedi ki, artıq bundan sonra borular Azərbaycanda istehsal olunacaq, bu məhsulun xaricdən alınmasına əlavə vəsait xərclənməyəcəkdir. Gələcəkdə məhsul başqa ölkələrə də ixrac edilə bilər və müxtəlif diametrli borulara tələbat çox olacaqdır.
Prezident İlham Əliyev kompyuterin düyməsini basaraq müəssisəni rəmzi olaraq işə saldı və öz xeyir-duasını verdi.
Bölmənin digər xəbərləri
