AzMİU-da Vestminster Universiteti ilə birgə elmi-praktik təlim keçirilib
Bakı, 13 noyabr, AZƏRTAC
Azərbaycan Memarlıq və İnşaat Universiteti (AzMİU) ilə Böyük Britaniyanın Vestminster Universiteti arasında həyata keçirilən “Memarlıq abidələrinin bərpası və yenidən qurulması üzrə magistr səviyyəsində ikili diplom” proqramı çərçivəsində “Memarlıq elminin müasir problemləri” mövzusunda elmi-praktik təlim təşkil olunub. Tədbir AzMİU-nun Xarici əlaqələr şöbəsi və Ekologiya kafedrasının birgə təşkilatçılığı ilə reallaşıb.
Bu barədə AZƏRTAC-a AzMİU-dan məlumat verilib. Təlim çərçivəsində Vestminster Universitetinin Memarlıq və dizayn fakültəsinin tanınmış alimləri - professor Nasser Qolzari və dosent Rosa Schiano di Cola AzMİU-nun qonağı olublar. Qonaqlar universitetin müəllim heyəti və magistr tələbələri ilə görüşərək müasir memarlıq təcrübəsi, abidələrin qorunması və bərpası, eləcə də ekoloji dayanıqlılıq prinsipləri mövzusunda təqdimatlar ediblər. Tədbir həm elmi, həm də praktikyönümlü müzakirələr üçün əlverişli platforma rolunu oynayıb.
Dörd gün davam edən proqram çərçivəsində memarlıq və ekologiya ixtisasları üzrə magistrantlar üçün iki elmi-praktik təlim və üç seminar keçirilib. Təlimlərdə iştirakçılar memarlıq abidələrinin bərpası və yenidən qurulması mövzusunda layihələr üzərində işləyib, bu layihələrə ekoloji dayanıqlılıq və ətraf mühitin qorunması prinsiplərini tətbiq ediblər. Seminarlarda isə memarlıq elminin müasir problemləri, urbanist tədqiqat metodları, davamlı və yaşıl memarlıq yanaşmaları, enerji səmərəliliyi və ekoloji planlaşdırma məsələləri müzakirə olunub.
Təlim tələbələrin akademik və elmi biliklərini artırmaqla yanaşı, onların ekoloji düşüncə tərzinin və davamlı memarlıq prinsiplərinin layihələrə tətbiqetmə bacarıqlarının inkişafına xidmət edib. Beynəlxalq müəllimlərin rəhbərliyi altında keçirilən interaktiv sessiyalar tələbələrə layihənin işlənməsi, fikir mübadiləsi aparılması və memarlıq abidələrinin qorunması sahəsində müasir yanaşmaları öyrənmək imkanı yaradıb.
Tədbirin yekununda iki universitet arasında gələcək əməkdaşlıq planları, o cümlədən ikili diplom proqramının genişləndirilməsi istiqamətində fikir mübadiləsi aparılıb. Qonaqlar təlimin yüksək səviyyədə təşkilini qeyd edərək, AzMİU ilə gələcək birgə layihələrin həyata keçirilməsində maraqlı olduqlarını bildiriblər.
Bölmənin digər xəbərləri
