AZSTAND və AzMİ nümayəndələri Daşkənddə beynəlxalq tədbirdə iştirak ediblər
Bakı, 4 dekabr, AZƏRTAC
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Standartlaşdırma İnstitutunun (AZSTAND) baş direktorunun müavini Səbinə Məmmədli və Azərbaycan Metrologiya İnstitutunun (AzMİ) baş direktorunun müavini Madar Quliyev İslam Ölkələrinin Standartlar və Metrologiya İnstitutunun (SMIIC) Baş Assambleyasının 20-ci iclasında iştirak ediblər.
AZSTAND-dan AZƏRTAC-a bildirilib ki, Daşkənd şəhərində keçirilən tədbirə SMIIC-ə üzv olan 48 dövlətin, həmçinin İslam Əməkdaşlıq Təşkilatı (İƏT), BMT-nin Sənaye İnkişafı Təşkilatı (UNIDO), Körfəz Əməkdaşlıq Şurasının Standartlaşdırma Təşkilatı (GSO), Ərəb Sənaye İnkişafı, Standartlaşdırma və Mədənçilik Təşkilatı (AIDSMO) və İslam Qida Təhlükəsizliyi Təşkilatı (IOFS) kimi beynəlxalq qurumların nümayəndələri qatılıblar.
İclas zamanı ticarətdə texniki maneələrin azaldılması, metrologiya və standartlaşdırma sahəsində yanaşmaların modernləşdirilməsi, uyğunluğun qiymətləndirilməsi sistemlərinin təkmilləşdirilməsi, eləcə də SMIIC-in gələcək proqram və büdcəsinin təsdiqi müzakirə edilib.
Bundan əlavə, SMIIC-in Strateji Planı çərçivəsində görülən işlər, akkreditasiya sahəsində texniki məsələlər, illik fəaliyyət planı, qəbul olunmuş qərarların icra vəziyyəti və SMIIC Rəqəmsal Sertifikatlar Sistemi barədə məlumat təqdim edilib.
Həmçinin iclas zamanı standartlaşdırma üzrə Texniki Komitələrin (TK) effektivliyinin təmin edilməsi məqsədilə iştirak səviyyəsinin yüksəldilməsi, qəbul edilən və dərc olunan standartların sayının artırılması, o cümlədən qlobal tərəfdaşlarla əməkdaşlıq imkanlarının gücləndirilməsi məsələlərinə nəzər salınıb.
Sonda SMIIC-in növbəti illik toplantısının Rusiya Federasiyasının Kazan şəhərində keçirilməsi qərara alınıb.
Bölmənin digər xəbərləri
