Bahar Muradova: Uşaqlar üçün daha təhlükəsiz rəqəmsal mühit yaratmaq mümkündür
Ankara, 21 aprel, AZƏRTAC
Rəqəmsal texnologiyaların sürətli inkişafı uşaqlara yeni imkanlar yaratmaqla yanaşı, onları ciddi risklərlə də üz-üzə qoyur. Kiberzorakılıq, şəxsi məlumatların sui-istifadəsi, zərərli kontentə çıxış və onlayn istismar artıq qlobal problemə çevrilib. Bu səbəbdən hüquqi çərçivələrin mövcudluğu kifayət deyil - əsas məsələ onların real və effektiv tətbiqidir. Burada dövlətin həm tənzimləyici, həm də qoruyucu və preventiv rolu xüsusi əhəmiyyət daşıyır.
AZƏRTAC xəbər verir ki, bu fikri Ailə, Qadın və Uşaq Problemləri üzrə Dövlət Komitəsinin sədri Bahar Muradova aprelin 21-də Ankarada keçirilən “Rəqəmsal mühitdə uşaqların müdafiəsi sahəsində beynəlxalq siyasət və təcrübə mübadiləsi” mövzusunda tədbir zamanı səsləndirib.
Tədbir çərçivəsində nazirlər səviyyəsində təşkil olunan “Rəqəmsal mühitdə uşaqların qorunması və gücləndirilməsi” başlıqlı dəyirmi masada çıxış edən Komitə sədri beynəlxalq təcrübəyə diqqət çəkərək bildirib ki, bu sahədə ən uğurlu yanaşmalar kompleks xarakter daşıyır.
Onun sözlərinə görə, qanunvericilik müasir texnoloji inkişafla uzlaşmalı, çevik və dinamik olmalıdır. Eyni zamanda, dövlət qurumları, təhsil müəssisələri, texnologiya şirkətləri və vətəndaş cəmiyyəti arasında güclü əməkdaşlıq qurulmadan onlayn təhlükəsizliyi təmin etmək mümkün deyil.
Dövlət Komitəsinin sədri bu istiqamətdə Azərbaycanda “Uşaqların zərərli informasiyadan qorunması haqqında” Qanunun xüsusi əhəmiyyət kəsb etdiyini ifadə edib: “Qanun uşaqların fiziki, psixoloji və mənəvi inkişafına zərər verə biləcək informasiyadan qorunmasını dövlət siyasətinin əsas prioritetlərindən biri kimi müəyyən edir. Eyni zamanda, uşağın mənafeyinin üstün tutulması prinsipi bütün tədbirlərin mərkəzində dayanmalıdır”.
Monitorinq və qiymətləndirmə mexanizmlərinin gücləndirilməsinin də vacib olduğunu qeyd edən B.Muradova bildirib ki, qəbul edilən siyasətlərin təsiri mütəmadi ölçülməli, mövcud boşluqlar operativ şəkildə aradan qaldırılmalıdır. Bununla yanaşı, rəqəmsal mühit sərhəd tanımadığından beynəlxalq əməkdaşlıq da bu sahədə mühüm rol oynayır.
“Azərbaycanda da bu istiqamətdə mühüm addımlar atılır. “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı” və “Uşaq hüquqları haqqında” Qanun bu sahədə sistemli yanaşmanı gücləndirir”, - deyə Komitə sədri ifadə edib.
Yekun olaraq B.Muradova qeyd edib ki, güclü qanunvericilik, effektiv icra, geniş maarifləndirmə və çoxtərəfli əməkdaşlıq birlikdə tətbiq olunduqda uşaqlar üçün daha təhlükəsiz rəqəmsal mühit yaratmaq mümkündür.
Bölmənin digər xəbərləri
