BAKI BANKLARARASI VALYUTA BİRJASININ VALYUTA BÖLMƏSİNDƏ HƏRRACLARIN HƏCMİ ÜÇ DƏFƏ ARTMIŞDIR
Birjanın informasiya-təhlil bölməsindən AZƏRTAC-ın müxbirinə bildirmişlər ki, valyuta bölməsinin ümumi dövriyyəsində bağladıqları əqdlərin sayına görə lider banklar sırasına Azərbaycan Beynəlxalq Bankı, “Bank Standard kommersiya bankı” QSC, “Xalqbank”, “Texnikabank” və “UniBank” səhmdar-kommersiya bankları daxil olmuşlar.
Avqust ayında BBVB-nin valyuta bölməsinin hərraclarında 21 bank iştirak etmişdir. Həmin ay EHBS-də 46 ticarət sessiyası keçirilmiş, 113 əqd bağlanmışdır. ABŞ dolları üzrə hərracların həcmi 339 milyon 461 min AZN və ya 383,206 milyon ABŞ dolları olmuşdur. AUR üzrə qeydə alınmış əqdlərin həcmi 7 min 956,2 manat təşkil etmişdir. Ötən ayla müqayisədə valyuta bölməsində hərracların həcmi 3 dəfədən çox artmışdır. Bu ilin 8 ayının yekunlarına görə, valyuta bölməsinin dövriyyəsi manat ekvivalenti ilə 849,723 milyon təşkil etmişdir ki, bu da 2005-ci ilin yanvar-avqust aylarının göstəricilərinə nisbətən 94,31 faiz çoxdur.
Milli valyutanın birja məzənnəsi avqustda 0,68 faiz möhkəmlənərək, 1 dollar üçün 0,8869 manatdan 0,8809 manata enmişdir. Nəticədə manatın ABŞ dollarına nisbətdə orta hesablanmış məzənnəsi 1 ABŞ dolları üçün 0,8858 AZN təşkil etmişdir, halbuki iyul ayında bu göstərici 0,8906 AZN idi. Ötən il ərzində milli valyutanın birja məzənnəsi ABŞ dollarına nisbətən 4,82 faiz möhkəmlənmişdir.
Bölmənin digər xəbərləri
