ELM VƏ TƏHSİL
Bakıda 2 məktəbəqədər təhsil müəssisəsi istifadəyə verilib
Bakı, 3 iyul, AZƏRTAC
Bakı şəhəri Hövsan qəsəbəsində 13 və 14 nömrəli uşaq bağçaları istifadəyə verilib.
Bu barədə AZƏRTAC-a Bakı Şəhəri üzrə Təhsil İdarəsindən (BŞTİ) məlumat verilib. Bildirilib ki, yeni istifadəyə verilən 2 uşaq bağçasında ümumilikdə 10 qrup fəaliyyət göstərir. Uşaq bağçalarında 3-6 yaşlı 200 uşağın təlim-tərbiyəsi ilə 46 işçi məşğul olur.
Tədbirdə çıxış edən BŞTİ-nin müdiri Mehriban Vəliyeva, Elm və Təhsil Nazirliyinin Məktəbəqədər təhsilin təşkili və idarəolunması sektorunun müdiri İlahə Rəsulova ölkəmizdə təhsilin inkişafına göstərilən dövlət qayğısından söz açıblar. Bu baxımdan məktəbəqədər təhsil müəssisələri şəbəkəsinin genişləndirildiyi və mövcud müəssisələrdə infrastrukturun davamlı olaraq yenilənməsi istiqamətində mühüm işlər görüldüyü diqqətə çatdırılıb.
Qeyd edək ki, məktəbəqədər təhsil müəssisələri şəbəkəsinin genişləndirilməsi, məktəbəqədər təhsilə cəlb olunan uşaqların əhatə dairəsinin artırılması prioritet kimi qarşıda duran əsas istiqamətlərdəndir.