Bakı, 3 oktyabr, P.İmanova, AZƏRTAC

Oktyabrın 3-də Bakıda Azərbaycan Milli Elmlər Akademiyası (AMEA) Botanika İnstitutunun 80 illik yubileyinə həsr olunan “Biomüxtəlifliyin mühafizəsinə innovativ yanaşmalar” mövzusunda beynəlxalq konfrans işə başlayıb.

AZƏRTAC xəbər verir ki, tədbir AMEA-nın Botanika, Molekulyar Biologiya və Biotexnologiyalar institutlarının və Mərkəzi Nəbatat Bağının birgə təşkilatçılığı ilə reallaşdırılıb.

AMEA-nın prezidenti, akademik Akif Əlizadə institutun 80 ildə keçdiyi şərəfli yola nəzər salıb, bu elm müəssisəsinin tarixi, fəaliyyət istiqamətləri, burada aparılan elmi-tədqiqat işləri barədə məlumat verib. Bildirilib ki, ölkədə bitkilər aləmini öyrənən genişprofilli elmi mərkəz kimi tanınan bu müəssisənin 80 illik fəaliyyəti dövründə botaniklərimizin səyi nəticəsində floranın növ tərkibi müəyyənləşdirilib, Azərbaycan və Qafqaz florası, eləcə də elm üçün onlarla yeni cins və 1000-dək növ aşkarlanıb, respublikanın ayrı-ayrı botaniki-coğrafi rayonlarında çoxlu növ və cinsin yeni yayılma əraziləri müəyyən edilib.

Qeyd edilib ki, institut rəsmi bir qurum kimi 1936-cı ildə SSRİ Elmlər Akademiyası Zaqafqaziya filialının Azərbaycan botanika bölməsinin bazasında təsis edilib. İnstitutun təşəkkül tapmasında və inkişafında onun ilk direktoru, görkəmli botanik, SSRİ Elmlər Akademiyasının həqiqi üzvü A.Qrossheymin mühüm rolu olub. Akademik A.Qrossheym tərəfindən Azərbaycanda floristik və geobotaniki tədqiqatların əsası qoyulub. Həmçinin bu elmi qurumun fəaliyyətində və inkişafında H.Əliyev, L.Prilipko, İ.Karyagin, Q.Axundov, M.Abutalıbov, C.Əliyev, İ.Səfərov, Ə.Xəlilov, R.Rzazadə, N.İsmayılov və başqa görkəmli alimlərin töhfələri olub.

AMEA-nın prezidenti bildirib ki, tədbirin məqsədi respublikada botanika elminin tarixi inkişaf mərhələlərini nəzərdən keçirmək, müasir vəziyyəti qiymətləndirmək və biomüxtəlifliyin saxlanılmasında innovativ botaniki tədqiqatların rolunu müəyyənləşdirməkdir. Konfransda botanika elminin müxtəlif sahələri üzrə yüzdən çox alim və mütəxəssisin, o cümlədən doqquz ölkəni təmsil edən otuzadək xarici alimin plenar və poster məruzələri dinləniləcək.

AMEA-nın Biologiya və Tibb Elmləri Bölməsinin akademik-katibi, akademik Əhliman Əmiraslanov ölkəmizdə görkəmli alimlərin, elm, təhsil müəssisələrinin yubileylərinin qeyd olunmasının ənənə halını aldığını söyləyib. Diqqətə çatdırılıb ki, bu ənənənin əsası ümummilli lider Heydər Əliyev tərəfindən qoyulub və hazırda Ulu Öndərin bu siyasəti dövlətimizin başçısı tərəfindən uğurla davam etdirilir.

Qeyd edilib ki, son illər Botanika İnstitutu beynəlxalq elm aləminə inteqrasiya olunur, burada alimlər tərəfindən müxtəlif beynəlxalq proqramlar üzrə müştərək tədqiqatlar aparılır. Həmçinin institutun yetişdirmələri dünyanın müxtəlif elm ocaqlarında fəaliyyətlərini uğurla davam etdirirlər.

Akademik vurğulayıb ki, Botanika İnstitutu ölkənin müxtəlif ali məktəblərinin kafedraları üçün mütəxəssislər hazırlayır, Azərbaycanda molekulyar biologiya və biotexnologiya sahəsinin inkişafı da bu qurumun adı ilə sıx bağlıdır. Uzun illər akademik Cəlal Əliyevin təşəbbüsü ilə Botanika İnstitutunun elmi istiqamətləri “Azərbaycan Respublikasında bioloji müxtəlifliyin qorunması və davamlı istifadəsi üzrə Milli Strategiya və Fəaliyyət Planı”na uyğun olaraq zamanın ən vacib tələbi kimi biomüxtəlifliyin tədqiq edilməsinin gücləndirilməsinə yönəldilib. İnstitutda akademik Cəlal Əliyevin rəhbərliyi ilə Azərbaycanda molekulyar biologiya, gen mühəndisliyi, bioinformatika və digər yeni istiqamətlərin müasir səviyyədə inkişafi naminə hərtərəfli tədqiqat işləri aparılıb və mühüm nailiyyətlər əldə olunub.

Botanika İnstitutunun direktoru, AMEA-nın müxbir üzvü Validə Əlizadə rəhbərlik etdiyi qurumun elmi istiqamətləri, beynəlxalq əlaqələri və burada aparılan tədqiqat işləri barədə məlumat verib.

Bildirilib ki, konfransda quru və su ekosistemləri biotasının strukturu, funksiyası və təkamülü məsələləri nəzərdən keçiriləcək, bitki populyasiyaları, növləri, assosiasiyalarının və ekosistemlərin mühafizəsi probleminin həlli yolları yerli ərazilər və böyük regionların nümunəsində göstəriləcəkdir. Həmçinin bioloji müxtəlifliyin molekulyar-genetik tədqiqat metodları gözdən keçiriləcək, yerli və qlobal səviyyədə baş verən təbii və antropogen amillərin təsiri altında populyasiyaların dinamikası məsələləri araşdırılacaq. Eyni zamanda, konfransın həsr edildiyi elmi problemlər sırasına təbii ehtiyatların mühafizəsi və səmərəli istifadəsi daxildir. Beynəlxalq tədbir geniş tədqiqatçı auditoriyası üçün nəzərdə tutulub və fitomüxtəliflik sahəsində müasir tədqiqatların nəticələrinin müzakirəsi və innovativ yanaşmalardan istifadə yolu ilə onların fundamental və tətbiqi istiqamətlərdə inkişaf perspektivlərinin müəyyənləşdirilməsi məqsədi daşıyır.

Konfransda Berlin Botanika Bağı və Botanika Muzeyinin direktoru Tomas Borsch, Rusiya Elmlər Akademiyasının Botanika İnstitutunun direktoru Dmitri Geltman və Ankara Universitetinin professoru Filiz Ertunc institutun kollektivini təbrik edib, onlara gələcək fəaliyyətlərində uğurlar arzulayıblar.

Tədbirdə Botanika İnstitutunun fəaliyyətinə həsr edilən film nümayiş olunub.

Konfrans işini oktyabrın 4-dək “Bitki müxtəlifliyinin mühafizəsi”, “Qlobal iqlim dəyişiklikləri”, “Ərzaq və kənd təsərrüfatı üçün biomüxtəliflik” bölmələri üzrə AMEA-nın Botanika, Molekulyar Biologiya və Biotexnologiyalar institutlarında, Mərkəzi Nəbatat Bağında davam etdirəcək.