BAKIDA DÜNYA GƏNCLƏRİNİN IV MƏŞĞULLUQ SAMMİTİ İŞİNİ DAVAM ETDİRİR
AZƏRTAC xəbər verir ki, Heydər Əliyev Fondunun, Gənclər və İdman Nazirliyinin təşkilatçılığı ilə Bakıda keçirilən Dünya gənclərinin IV məşğulluq sammiti (YES) sentyabrın 26-da “Gülüstan” sarayında işini davam etdirmişdir.
Misirin birinci xanımı Syuzan Mübarək sammitin işində iştirak etmişdir.
Bakı sammitinin üçüncü günü ətraf mühit problemlərinin həllində gənc liderlərin iştirakı, sahibkarlığın cəmiyyətin inkişafında rolu və digər məsələlər müzakirə olunmuşdur.
Bildirilmişdir ki, bu sammit onu sübut etdi ki, dünya gəncləri fəaldırlar və onlar istənilən beynəlxalq tədbirlərdə, layihələrdə iştirak edə bilərlər. Dünyada ətraf mühitin çirkləndirilməsi, iqtisadi, yoxsulluq, aclıq kimi bir çox problemlər var və bunların həllində gənclərin iştirakı vacibdir.
Çıxış edənlər müzakirə olunan məsələlər barədə fikirlərini söyləmişlər. Qeyd edilmişdir ki, dünya gənclərinin işbirliyi əsasdır, bunun üçünsə yeni texnologiyaların tətbiqi vacibdir. Yeni texnologiyalar gənclərə yeni nailiyyətlər, imkanlar yarada bilər. Bu sammitin keçirilməsi bir daha sübut etdi ki, bura toplaşan gənclərin hər birinin əlindən böyük işlər gələ bilər, birləşib böyük işlər görə bilərlər.
Sammit ərzində təhsil və sağlam həyatın seçilməsi də diqqət mərkəzində olmuşdur.
Günün ikinci yarısında sammit müxtəlif bölmə iclasları ilə davam etmişdir. İclaslarda kənd yerlərində gənc nəslin gəlirləri, gənclərin imkanlarının genişləndirilməsi və məşğulluğunun təmin edilməsində dünyanın ən qabaqcıl təcrübələri, gənclərin məşğulluq mərkəzlərinin yaradılması, sahibkarlıqla bağlı maarifləndirmə, insan kapitalının idarə edilməsi, məktəbdən kənar qalan gənclərlə iş, gənclər proqramlarının təsir imkanları və yoxsulluğun aradan qaldırılmasında gənclərin rolu və digər məsələlər müzakirə olunmuş, bir sıra maraqlı təkliflər səslənmişdir.
Sammit işini sentyabrın 27-də yekunlaşdıracaqdır.
######
 |
 |
Bölmənin digər xəbərləri
