Bakıda keçirilən İkinci İllik Beynəlxalq İngilis Dili üzrə Təlim Konfransı başa çatıb
Bakı, 16 iyun, AZƏRTAC
İyunun 16-da ABŞ-ın ölkəmizdəki səfirliyinin, Elm və Təhsil Nazirliyinin, ADA Universitetinin və Şimali Karolina Dövlət Universitetinin nümayəndələri orta məktəblərin 500-dən çox azərbaycanlı ingilis dili müəllimləri üçün ikigünlük seminar və konfransın açılışını ediblər.
Səfirlikdən AZƏRTAC-a bildirilib ki, “İngilis dilinin tədrisində strategiyalar və innovasiyalar” adlı konfrans Şimali Karolina Dövlət Universiteti tərəfindən idarə olunan və ABŞ Dövlət Departamenti tərəfindən maliyyələşdirilən azərbaycanlı ingilis dili müəllimləri üçün 14 həftəlik magistr səviyyəsində onlayn “İngilis Dili Təlim Sertifikat Proqramı”nın üçüncü buraxılışının kulminasiya nöqtəsidir. Tədbir Azərbaycanın bir sıra regionlarından olan müəllimləri bir araya gətirib və iştirakçılar üçün pedaqoji qabaqcıl təcrübələri öyrənmək və həmyaşıd pedaqoqların peşəkar şəbəkəsini qurmaq üsullarını inkişaf etdirmək imkanı olub. Onlar, həmçinin kommunikativ təlim metodları, sinifdə texnologiyadan istifadə, kurrikulumun hazırlanması kimi mövzuları müzakirə ediblər.
2020-2022-ci illərdə təxminən 200 azərbaycanlı ingilis dili müəllimi, bu il isə daha 100 nəfər proqramı başa vurub. Səfirlik ABŞ-Azərbaycan ikitərəfli münasibətlərinə və insanların insanlarla əlaqələrinə töhfə verməklə Azərbaycanda ingilis dili proqramlaşdırmasını dəstəkləmək imkanından məmnun olduqlarını bildirib və ölkənin müəllim korpusu arasında bu peşəkar inkişaf imkanlarına olan motivasiyanı vurğulayıb.
Açılış nitqi ilə çıxış edən mədəniyyət məsələləri üzrə müşavir Salman Hacı proqramın məzunlarını alqışlayıb və iştirakçıların Azərbaycan məktəblərində ingilis dilinin tədrisinin yaxşılaşdırılması istiqamətində göstərdikləri səyləri yüksək qiymətləndirib: “Mən çox şadam ki, Şimali Karolina Universitetini bitirmiş 100 müəllim-şagirddən çoxu bu gün buradadır. İngilis dilini bilmək mühüm bacarıqdır və Azərbaycanın gələcək nəslini qlobal səhnəyə çıxarmaq üçün sizin rolunuz çox vacibdir. Amerika universitetlərindən birində magistratura kursunu bitirmək də böyük nailiyyətdir və siz öz əla işinizlə fəxr etməlisiniz”.
Təhsil İnstitutunun direktoru Rüfət Əzizov əlavə edib: “Azərbaycanın ümumi təhsil sistemində 10 minə yaxın ingilis dili müəllimimiz var. Hazırda Təhsil İnstitutu əvəzsiz beynəlxalq təcrübələrdən istifadə edərək ingilis dili dərsliklərinin yenilənməsi ilə məşğuldur. Buna görə də müəllimlərimizin yenilənmiş dərsliklərdəki məzmunu effektiv şəkildə şagirdlərə ötürərək tədris etməkləri üçün lazımi bacarıqlara malik olmaqlarını təmin etmək mütləq zərurətdir. Ona görə də ingilis dili müəllimlərinin təkmilləşdirilməsi sahəsində son üç ildə görülən işlər mühüm əhəmiyyət kəsb edir. Biz ingilis dili müəllimlərimizin peşəkar bacarıqlarının artırılmasına yönəlmiş birgə səyləri dərindən qiymətləndiririk”.
ADA Universitetinin akademik işlər üzrə prorektoru Vəfa Kazdal deyib: “Ölkədə təhsilin inkişafına hər zaman dəstək olan ADA Universitetində İkinci İngilis Dili Təlim Konfransına ev sahibliyi etməkdən məmnunuq. Müəllimlərin bu təlim vasitəsilə əldə etdikləri təkmil dil bilikləri, metodologiya və tədqiqat bacarıqları onların sinif otaqlarında minlərlə şagirdə böyük təsir göstərəcək”.
Şimali Karolina Dövlət Universitetində qlobal təhsil və məşğulluq üzrə prorektoru Maykl Bustl bütün iştirakçıların səylərini alqışlayıb: “Azərbaycanda gələcək nəslin tədrisində həvəsiniz, yaradıcılığınız və yorulmaz enerjiniz üçün bütün Azərbaycan müəllimlərinə təşəkkür edirəm. Gənclər ingiliscə danışmağı öyrənəndə və yaxşı danışanda bu, onlara dünyanı açır. Biz, Şimali Karolina Dövlət Universiteti olaraq sizin cəmiyyətinizi və dünyamızı daha yaxşı bir yerə çevirmək üçün bizə töhfə vermək fürsətini yaratdığınıza görə minnətdarıq”.
ABŞ-ın Azərbaycandakı səfirliyi və Şimali Karolina Dövlət Universiteti Azərbaycan Respublikasının Elm və Təhsil Nazirliyinin dəstəyi ilə bu uğurlu layihəni dördüncü dəfə 2023-cü ildən 2024-cü ilə qədər davam etdirmək niyyətindədir. Bu tərəfdaşlıq Azərbaycanda ingilis dilinin tədrisində əhəmiyyətli irəliləyişlərlə nəticələnib və bütün təhsil sektorunda ingilis dilində səlis danışıq səviyyəsini artırmaq məqsədinə xidmət edir. ABŞ səfirliyinin bu və digər ingilisdilli proqramlarının bir neçə məzunu beynəlxalq konfranslarda, mübadilə proqramlarında uğurla iştirak edib və digər diqqətəlayiq nailiyyətlər əldə ediblər.
Bölmənin digər xəbərləri
