SİYASƏT
Bakıda Koreya Respublikasının milli bayramı qeyd olunub
Bakı, 4 oktyabr, AZƏRTAC
Oktyabrın 4-də Bakıda Koreya Respublikasının Azərbaycandakı səfirliyi bu ölkənin milli bayramı - dövlətin yaranması günü və Azərbaycan ilə Cənubi Koreya arasında diplomatik əlaqələrin qurulmasının 25 illiyi münasibətilə rəsmi qəbul təşkil edib.
AZƏRTAC xəbər verir ki, Koreya Respublikasının və Azərbaycan Respublikasının dövlət himnləri səsləndirildikdən sonra səfir Kim Çanq-gyu çıxış edərək ötən illər ərzində Koreyanın keçdiyi inkişaf yolundan danışıb, ölkədə iqtisadi və mədəni sahələrdə böyük tərəqqiyə nail olunduğunu vurğulayıb. Bu il Koreya və Azərbaycan arasında diplomatik münasibətlərin qurulmasının 25 illiyinin tamam olduğunu bildirən səfir ötən müddət ərzində ölkələrimizin bir çox sahələr üzrə yaxın əməkdaşlıq etdiyini diqqətə çatdırıb.
Səfir Kim Çanq-gyu qeyd edib ki, siyasi əməkdaşlıqda vacib olan amillərdən biri də yüksək vəzifəli şəxslərin qarşılıqlı rəsmi səfərlərinin təşkilidir. Diplomat bu kontekstdə Azərbaycan Respublikası Milli Məclisinin sədri Oqtay Əsədovun Seula və Koreya Respublikasının Parlament Assambleyasının vitse-prezidenti Park Joo Sunun Bakıya səfərlərini xatırladıb. O, əminliyini bildirib ki, birgə səylər nəticəsində ikitərəfli münasibətlər xalqlarımızın mənafeyinə və maraqlarına uyğun olaraq bundan sonra daha da inkişaf edəcək.
Rəsmi qəbulda çıxış edən nəqliyyat, rabitə və yüksək texnologiyalar naziri Ramin Quluzadə Azərbaycan hökuməti adından Koreya xalqını təbrik edib, tərəqqi, sülh və firavanlıq arzularını çatdırıb. Ölkələrimiz arasında yüksək səviyyəli diplomatik əlaqələr qurulmasının məmnunluq doğurduğunu bildirən nazir qeyd edib ki, Koreya Respublikasının Cənubi Qafqaz regionunda ilk səfirliyi məhz Azərbaycanda açılıb.
Ölkələrimiz bir sıra beynəlxalq təşkilatlar, xüsusi ilə BMT çərçivəsində sıx əməkdaşlıq edir. Azərbaycan xalqının ümummilli lideri Heydər Əliyevin ölkələrimiz arasında münasibətləri yüksək dəyərləndirdiyini xatırladan Ramin Quluzadə diqqətə çatdırıb ki, bu əlaqələr qarşılıqlı faydalı tərəfdaşlıq və dostluq prinsiplərinə əsaslanır. Siyasi, iqtisadi, humanitar, mədəni, xüsusilə elmi-texniki sahədə əlaqələr yüksələn xətlə inkişaf edir. Koreyanın tanınmış şirkətləri Azərbaycanda həyata keçirilən müxtəlif irimiqyaslı layihələrə investisiya yatırır. Onların fəaliyyəti əsasən kənd təsərrüfatı, infrastruktur, səhiyyə, informasiya-kommunikasiya texnologiyalarını əhatə edir.
Nazir vurğulayıb ki, Koreya Respublikası Ermənistan-Azərbaycan, Dağlıq Qarabağ münaqişəsi ilə bağlı Azərbaycanın beynəlxalq hüquqa söykənən haqlı mövqeyini və ərazi bütövlüyünü birmənalı olaraq dəstəkləyir və bu, ölkəmizdə yüksək qiymətləndirilir.
Qəbulda rəsmi şəxslər, Milli Məclisin deputatları, Azərbaycanda fəaliyyət göstərən diplomatik korpusun təmsilçiləri və ictimaiyyət nümayəndələri iştirak ediblər.
Tədbirin bədii hissəsində Koreyanın milli rəqsləri nümayiş etdirilib.