BAKIDA MÜTLƏQ KATEQORİYADA KEKUSİNKAY KAYKAN KARATE ÜZRƏ BİRİNCİ DÜNYA ÇEMPİONATI KEÇİRİLƏCƏKDİR
Bakı, 19 iyun (AZƏRTAC). İyunun 27-də Bakı İdman Sarayında kişilər və qadınlar arasında mütləq kateqoriyada kekusinkay kaykan karate üzrə birinci dünya çempionatı başlayacaqdır. Azərbaycanı yarışlarda Könül Nəzərova, Ruslan Hüseynov, Samir Bayramov, Sərxan Məmmədov, Aqşin Əliyev, Xəyyam Həsənov, Səbuhi Lətifov, Elbrus Məmmədov, Cavidan İsayev və Tural Məmmədov təmsil edəcəklər.
İkigünlük yarışlarda İran, Əfqanıstan, Türkmənistan, Tacikistan, Özbəkistan, Qırğızıstan, Qazaxıstan, Misir, Ukrayna, Norveç, Livan, Pakistan, Şri-Lanka, Monqolustan, Yaponiya, Koreya, Suriya, Çin, Finlandiya, Gürcüstan, Rusiya, İraq, Yunanıstan, Hindistan, Fransa, İngiltərə, Avstriya, Şotlandiya, Almaniya, Polşa, Kolumbiya, Türkiyə, Latviya, Litva, Belarus və İordaniyadan 150-dək karateçi iştirak edəcəkdir.
Şərq döyüş sənətinin tarixi böyük məktəblərin əsasını qoymuş ustadların, onların mədəni ənənələrini qoruyub saxlamaq iqtidarında olan yetirmələrinin və ardıcıllarının tarixidir. Kekusinkay karatenin tarixi də onun yaradıcısı olan Oyama Masutatsunun həyatı və axtarışları tarixçəsidir. Onun qeyri-adi şəxsiyyəti, fantastik qabiliyyəti, yaxın silahdaşlarının səyləri sayəsində kekusinkay dünyada geniş yayılmışdır. Hazırda karatenin bu növü ilə 140 ölkədə təxminən 15 milyon adam məşğul olur.
Çempionatın rəsmi açılışı iyunun 28-də saat 12-də olacaqdır.
Bölmənin digər xəbərləri
