BAKIDA “XƏZƏR DÜNYANIN ÇOXQÜTBLÜ MƏRKƏZİDİR” FORUMU KEÇİRİLƏCƏKDİR

19.09.2006 [11:32]
Çap et
A⁺ A^-

AZƏRTAC xəbər verir ki, sentyabrın 18-də Beynəlxalq Mətbuat Mərkəzində Azərbaycan Respublikasının Mədəniyyət və Turizm, Ekologiya və Təbii Sərvətlər nazirlikləri “Alfa-Media-Alyans” Prodüsser Mərkəzi ilə birlikdə Xəzərətrafı ölkələrin Bakıda keçiriləcək “Xəzər dünyanın çoxqütblü mərkəzidir” forumuna həsr olunmuş mətbuat konfransı keçirmişlər.

Bildirilmişdir ki, sentyabrın 21-dən 23-dək keçiriləcək forumda Xəzərətrafı ölkələrin dövlət və hökumət nümayəndələri ilə yanaşı, elm və mədəniyyət xadimləri də iştirak edəcəklər. Tədbirdə əsasən, mədəni, ekoloji və turizm məsələlərinə diqqət yetiriləcəkdir. Məqsəd dünya ictimaiyyətinin diqqətini Xəzərin problemlərinə cəlb etmək və bu problemlərin həllində Xəzərətrafı dövlətlərin birliyinə nail olmaqdır.

Forumda Azərbaycan, Rusiya, İran, Türkmənistan, Qazaxıstan, Gürcüstan kinematoqrafçılarının Xəzərlə bağlı çəkdikləri filmlər nümayiş etdiriləcəkdir.

Forumun keçirilməsini Nikoil İnvestisiya Kommersiya Bankı maliyyələşdirəcəkdir.