BAKIDA YENİYETMƏ İDMANÇILAR ARASINDA STOLÜSTÜ TENNİS ÜZRƏ BEYNƏLXALQ TURNİR BAŞLAMIŞDIR
AZƏRTAC xəbər verir ki, iyunun 23-də Bakı Olimpiya İdman Kompleksində 1994-cü il təvvəllüdlü və daha az yaşlı yeniyetmələr arasında stolüstü tennis üzrə beynəlxalq turnir başlamışdır. Əməkdar məşqçi, SSRİ çempionu Mais Şeydabəyovun xatirəsinə həsr olunmuş yarışda Azərbaycan idmançıları ilə yanaşı Gürcüstan, İran, Rusiya Federasiyasının Kalmıkiya, Volqoqrad və Dağıstan vilayətlərindən ümumilikdə 50-dən çox tennisçi mübarizə aparır. Turnirin açılış mərasimində Azərbaycan Stolüstü Tennis Federasiyasının baş katibi İbrahim Əfəndiyev çıxış edərək, tanınmış tennisçi Mais Şeydabəyovun Azərbaycan idmanının inkişafındakı xidmətlərini vurğulamışdır. Onun yetirmələri dəfələrlə SSRİ çempionatlarında, müxtəlif turnirlərdə layiqincə çıxış etmiş, müxtəlif medallara sahib olmuşlar.
Mərhumun oğlu Fuad Şeydabəyov atasının əziz xatirəsini yüksək tutduqları üçün Azərbaycan Stolüstü Tennis Federasiyasının rəhbərliyinə minətdarlığını bildirərək, bu turnirin Azərbaycanın idman həyatında öz layiqli yerini tutacağına ümid etdiyini vurğulamışdır.
Turnirə iyunun 25-də yekun vurulacaqdır.
######
Bölmənin digər xəbərləri
