Bakıdakı konfrans Qərbdə kök salmış İslamofobiyaya qarşı mübarizəyə töhfə verəcək - ŞƏRH
Bakı, 9 mart, AZƏRTAC
Azərbaycan islamofobiya, ksenofobiya kimi mərəzlərdən əziyyət çəkən ölkələrdəndir. Son 34 ildə biz bunun dəfələrlə şahidi olmuşuq. Birinci Qarabağ müharibəsi başlayanda, soydaşlarımız qaçqın və məcburi köçkün düşəndə, sonrakı illərdə, elə bu günün özündə də hər cür ayrı-seçkiliklə üzləşirik. Ksenofobiyanın tüğyan etdiyi Qərbdə Ermənistana, Gürcüstana, Ukraynaya bir münasibət var, Azərbaycana, digər türk və müsəlman ölkələrinə isə başqa. Avropa onları özününkü, bizi isə yad hesab edir. Ermənilərin qanlı əməllərinə “azadlıq uğurunda mücadilə” adını verirlər, Azərbaycanın separatizmlə mübarizəsini, ərazi bütövlüyünü təmin etməsini “etnik təmizləmə” adlandırırlar. Bu mənada hesab edirəm ki, Bakıda “Müxtəlifliyin qorunması: 2024-cü ildə İslamofobiya ilə mübarizə” mövzusunda beynəlxalq konfransın keçirilməsi olduqca əhəmiyyətli hadisədir. Bu konfransın Qərbdə kök salmış islamofobiya, ksenofobiya və irqçiliklə mübarizəyə töhfə verəcəyini düşünürəm.
Bu sözləri AZƏRTAC-a açıqlamasında politoloq Ramiz Alıyev söyləyib.
“Prezident İlham Əliyevin də qeyd etdiyi kimi, XXI əsrdə İslamofobiya, ksenofobiya və irqçiliyə yer olmamalıdır. Dindən siyasi alət, silah kimi istifadə dünyaya yalnız ixtilaflar, gərginliklər gətirə bilər. Qərəzli, yanlış ideologiyalarla doldurulmuş beyinlər sağlam düşüncədən uzaq olurlar və belə düşüncə sahiblərinin siyasi hakimiyyətlərdə yüksək postlar tutması arzuolunmaz hallara səbəb olur. İslamofobiya ilə Mübarizə Gününə dair BMT-nin Qətnaməsində də qeyd edildiyi kimi, dini inanclarla bağlı ayrı-seçkilik, dözümsüzlük və şiddət hallarının çoxalması dərin narahatlıq doğurur. Təəssüflə qeyd edək ki, özünü demokratik hesab edən bir sıra Qərb ölkələrinin dövlət siyasətində islamofobiya elementləri kök salıb. Sadə bir misal çəkək. Onlar Afrikadan gələnlərin üzünə qapıları bağlayırlar, qanunları sərtləşdirirlər, amma ukraynalı qaçqınlara qucaq açırlar, onlara hər cür dəstək göstərirlər. Nə üçün ağbəniz, sarışın, yaşıl gözlü ukraynalı qaçqınlara humanist davranırlar, onlara əl tuturlar, amma qaradərili afrikalılar, ərəblər tikanlı məftillərlə qarşılaşırlar? Nə üçün Qərb Gürcüstanın, Ukraynanın, Ermənistanın ərazi bütövlüyü barədə birmənalı mövqe ortaya qoyur, Azərbaycana çatanda ikili açıqlamalar verir? Xristian dünyasının müsəlmanlara qarşı artan nifrətləri dünyaya sülh deyil, qarşıdurma gətirir. Bəzi Avropa ölkələrində müqəddəs kitabımız “Qurani-Kərim”in yandırılması, Məhəmməd Peyğəmbərin karikaturalarının nəşr edilməsi kimi hərəkətlər söz azadlığı yox, başqalarının milli dəyərlərini, heysiyyətini təhqir etməkdir. Neokolonializm siyasətinin əsas fiqurlarından olan Fransa 100 il öncə olduğu kimi, bu gün də müsəlmanlara qarşı açıq-aşkar təzyiq və diskriminasiya siyasəti yürüdür. Onlar “dünyəvi dəyərlərin təbliği” adı altında sırf müsəlmanların hüquq və azadlıqlarını məhdudlaşdırırlar”, - deyə politoloq vurğulayıb.
O qeyd edib ki, İslamofobiyadan ən çox əziyyət çəkən ölkələrdən biri olan Azərbaycanın tarixi ərazilərində - İrəvanda, Zəngəzurda, Qarabağda mədəni irsimiz, İslam dininə aid abidələr ermənilər tərəfindən məqsədli şəkildə dağıdılıb, yer üzündən silinib. Təkcə işğal dövründə Qarabağda 65 məscid yerlə-yeksan edilib, müsəlman qəbiristanlığı məhv edilib, məscidlərimizdə donuz və digər heyvanlar saxlanılıb.
“Azərbaycan Ermənistanda dağıdılmış mədəni və dini abidələrimizin vəziyyətinin qiymətləndirilməsinin aparılması məqsədilə bu ölkəyə texniki missiyanın göndərilməsi üçün UNESCO-ya müraciət etsə də, bu günə qədər heç bir addım atılmayıb. Ermənistandan, eləcə də bəzi Qərb dövlətlərindən fərqli olaraq Azərbaycanda irqindən, dinindən asılı olmayaraq hər kəs sərbəst yaşayır, öz mədəniyyətlərini, dəyərlərini yaşadır. Heç kəs onlara mane olmur, yuxarıdan aşağı baxmır, əksinə dövlət səviyyəsində ayrı-ayrı dini konfessiyalara dəstəklər olunur. Bu mənada Avropa dövlətlərinin tolerantlıq, multikulturalizm sahəsində Azərbaycandan örnək götürəsi çoxlu sayda örnəklər mövcuddur”, - deyə Ramiz Alıyev diqqətə çatdırıb.
Bölmənin digər xəbərləri
