Balakəndə zəlzələnin nəticələrinin aradan qaldırılması istiqamətində kompleks tədbirlərin həyata keçirilməsinə başlanılmışdır
Balakən, 15 oktyabr (AZƏRTAC). Balakən rayonunda oktyabrın 14-də baş vermiş zəlzələnin nəticələrinin aradan qaldırılması istiqamətində kompleks tədbirlərin həyata keçirilməsinə başlanılmışdır.
AZƏRTAC xəbər verir ki, oktyabrın 15-də rayon icra hakimiyyətində Fövqəladə Hallar Nazirliyinin (FHN) məsul nümayəndələrinin və aidiyyəti dövlət qurumları rəhbərlərinin iştirakı ilə operativ müşavirə keçirilmişdir.
Məlumat verilmişdir ki, zəlzələdən dərhal sonra rayon fövqəladə hallar komissiyası tərəfindən yerlərdə ilkin araşdırma işlərinin aparılmasına başlanılmışdır. Məlum olmuşdur ki, zəlzələ nəticəsində rayonun 20-yə yaxın yaşayış məntəqəsində fərdi evlərə, ictimai binalara və sosial təyinatlı obyektlərə müxtəlif dərəcədə zərər dəymişdir. Yeraltı təkanlar nəticəsində Balakən şəhərində 2, Tülü kəndində 1, Qaysa kəndində isə 5 fərdi ev uçmuşdur. Bundan əlavə, fəlakət bölgəsində 590 fərdi ev qismən zərər çəkmişdir. Yeraltı təkanlar nəticəsində 9 sosial obyekt zədələnmişdir. İlkin məlumatlara görə, ailələrin yerləşdirilməsi üçün 300-dən artıq çadır tələb olunur.
FHN-nin işçi qrupları zərər çəkmiş ərazilərdə monitorinqlərə başlamışlar. Artıq Tülü kəndində 11 evə baxış keçirilmiş, 3 evin qəzalı vəziyyətə düşdüyü müəyyənləşmişdir.
Monitorinqlər davam etdirilir.
Bölmənin digər xəbərləri
