Baş dirijor: Nazim Rzayev milli musiqi mədəniyyətimizin inkişafında əvəzsiz tarixi rol oynayıb
Bakı, 13 dekabr, Günel Alıyeva, AZƏRTAC
Nazim Rzayev musiqi mədəniyyətimizin inkişafında həqiqətən tarixi rol oynayıb. Qara Qarayev adına Dövlət Kamera Orkestrinin formalaşması da onun adı ilə birbaşa bağlıdır. Nazim Rzayev kollektivin ilk bədii rəhbəri və baş dirijoru olub, orkestrin peşəkar məktəb və ənənələrinin formalaşmasında mühüm zəmin yaradıb.
Məhz buna görə biz onun xatirəsinə xüsusi konsert proqramı hazırlamağı özümüzə borc bildik. Yüzillik yubiley həm orkestr, həm də kollektivin həyatında mühüm rol oynamış böyük musiqiçilərin, dirijorların və bəstəkarların irsini yaşadan yaradıcı heyət üçün əlamətdar hadisədir. Bu, bizim üçün Maestronun - musiqiçinin, pedaqoqun, professorun, yüksək mədəni dəyərlərə malik bir şəxsiyyətin xatirəsinə ehtiramdır.
Bunu AZƏRTAC-ın müxbiri ilə söhbətində Opera və Balet Teatrının orkestrinin baş dirijoru, Azərbaycanın Əməkdar artisti Eyyub Quliyev deyib.
“Bu gün demək olar ki, Nazim Rzayevin qoyduğu xətti və yaratdığı ənənələri davam etdirirəm. Kamera orkestri həmişə bizi öz nailiyyətləri, maraqlı proqramları, konsertləri, xarici qastrolları ilə sevindirib. Bu, ən çevik və dinamik inkişaf edən kollektivlərdən biridir”, – deyə o qeyd edib.
Eyyub Quliyev bildirib ki, heyətdə nəsillərin təbii yenilənməsinə baxmayaraq, orkestr ənənələri qoruyur. Gənc musiqiçilər ilk rəhbər tərəfindən qoyulan təməli yaxşı bilirlər və ona hörmətlə yanaşırlar.
Dirijor, həmçinin şəxsi xatirələrini bölüşüb: “Atam mərhum Ramiz Quliyev, Xalq artisti, görkəmli tarzən Nazim Rzayevlə yaxından tanış idi və dostluq edirdi. Mənə danışırdı ki, onlar müxtəlif əsərlərin üzərində birlikdə çalışıblar, birgə fotolarını da görmüşəm. Sonralar məni konkret olaraq hansı əsərləri ifa etdikləri maraqlandırdı. Atam deyirdi ki, onlar dəfələrlə plenumlarda, qurultaylarda çıxış ediblər və bir çox Azərbaycan bəstəkarının əsərləri ilk dəfə Nazim Rzayevin rəhbərliyi ilə kamera orkestrinin ifasında səslənib”.
Eyyub Quliyevin sözlərinə görə, Nazim Rzayev həqiqətən hərtərəfli musiqiçi olub. O, fəaliyyətinə skripkaçı kimi başlayıb, Moskva Konservatoriyasında fundamental təhsil alıb, ölkəyə qayıtdıqdan sonra Azərbaycan Dövlət Akademik Opera və Balet Teatrında orkestrin konsertmeysteri kimi çalışıb, yəni güclü orkestr məktəbinə malik musiqiçi olub. Sonralar o, dirijorluğa keçib və Böyük Teatrda təcrübə keçib. Onu yalnız kamera musiqisi yox, həm də opera–balet repertuarı maraqlandırıb. Bu fakt bir daha göstərir ki, o, ifaçılıq sənətinin müxtəlif sahələrini məqsədyönlü şəkildə öyrənib.
“Onun yaradıcılıq bioqrafiyasında xüsusi yeri Fikrət Əmirovun “Min bir gecə” baleti tutur. Bu şah əsərin səhnə taleyi Nazim Rzayevin adı ilə sıx bağlıdır. O, baletin əsas dirijorlarından biri olub və baletin uğuruna görə SSRİ Dövlət mükafatına layiq görülüb. Əlbəttə, belə uğurlar böyük peşəkar nüfuz olmadan mümkün deyil. F.Əmirov kimi bəstəkarın etimadını qazanmaq üçün çox möhkəm bədii baza və qüsursuz zövq tələb olunur”, – deyə Əməkdar artist vurğulayıb.
Dirijor, Nazim Rzayevin yaradıcılıq obrazına və orkestr ilə işinə xüsusi diqqət yetirib. Eyyub Quliyevin sözlərinə görə, Maestronun üslubu təmkin və daxili intizamı ilə seçilirdi: jestləri qənaətcil, lakin son dərəcə dəqiq və ifadəli idi, heç bir xarici effektə üstünlük vermirdi. O, lazım bildiyini dəqiqliklə edirdi və məhz bu yanaşma ansamblda intizam yaradır, nəcib səslənmə, gözəl tembr və orkestrin xüsusi “nəfəs” mədəniyyətini formalaşdırırdı.
Bölmənin digər xəbərləri
