BDU-da Materialşünaslıq elmi-tədqiqat laboratoriyasının açılışı olub
Bakı, 29 may, AZƏRTAC
Bakı Dövlət Universitetinin (BDU) Tədqiqat, İnkişaf və İnnovasiyalar üzrə Mükəmməllik Mərkəzinin nəzdində Materialşünaslıq elmi-tədqiqat laboratoriyasının açılışı olub.
Bu barədə AZƏRTAC-a BDU-dan bildirilib.
Tədbirdə rektor Elçin Babayev BDU-da son illər elmi-tədqiqat infrastrukturunun möhkəmləndirilməsi, gənclərin elmi tədqiqatlara cəlb edilməsinin genişləndirilməsi ilə bağlı sistemli işlərin görüldüyünü bildirib. O qeyd edib ki, yeni açılan Materialşünaslıq elmi-tədqiqat laboratoriyası da BDU-da kimya sahəsi üzrə aparılan elmi tədqiqatlara öz töhfəsini verəcək, universitet-sənaye əlaqələrini genişləndirəcək.
Materialların hazırlanması və tədqiqi üçün zəruri olan müasir avadanlıqlarla – Almaniya istehsalı “Bruker D8 ENDEAVOR” toz kristallar üçün rentgen difraktometri və bərk maddələr üçün “S6 Jaguar” masaüstü dalğa-dispersiyalı rentgen flüoressent spektrometri (WD XRF) ilə təchiz edilmiş laboratoriya müxtəlif texnologiyalarla alınmış elmi-tədqiqat materialları, habelə mədən süxurları, tikinti materialları, sənaye tullantıları, neft tullantılarında qum fraksiyalarının və s. element analizi, quruluşunun öyrənilməsi və tədqiqinə imkan verir.
Laboratoriyada istifadə edilən rentgen diffraktometri toz halında olan kristallik quruluşlu maddələrin keyfiyyət (faza analizi) və kəmiyyət tərkibini hesablamağa, maddədəki kristallitlərin ölçülərini, gərginlik və deformasiya dərəcələrini müəyyənləşdirməyə imkan yaradır. “S6 Jaguar” tipli spektrometr bərk maddələrin tərkibində flüordan (F) urana (U) qədər hər hansı elementi ppm-dən 100 faizə qədər konsentrasiya diapazonunda təyin edir. Laboratoriya tədqiqat nümunəsinin hazırlanması üçün zəruri avadanlıqlarla – müxtəlif növ üyüdücülər, nümunə quruducu sobaları, vakuumlu filtrasiya sistemləri, sentrafuqa, nümunə presləyici avadanlıqlar, vibrasiyalı ələklər ilə təchiz edilib. Regionda bir ilk olan bu cür hərtərəfli təchiz edilmiş laboratoriya materialşünaslıq və metallurgiya, geologiya və minerologiya, kimya və nanotexnologiya, inşaat materialları və sement sənayesində müxtəlif işlərin görülməsi, habelə müxtəlif elmi və sifariş əsaslı layihələrin yerinə yetirilməsinə imkan verəcək.
Laboratoriyanın fəaliyyəti üçün Fövqəladə Hallar Nazirliyi tərəfindən xüsusi icazə və müvafiq sertifikatlar alınıb. İşçi personalın təhlükəsizliyinin təmin edilməsi üçün Gigiyena və Epidemiologiya Mərkəzi tərəfindən laboratoriya işçilərinə təhkim edilən termolüminessensiya dozimetrlərinin mütəmadi nəzarəti aparılacaq.
Azərbaycan Milli Elmlər Akademiyasının vitse-prezidenti, Elm və Təhsil Nazirliyinin akademik M.Nağıyev adına Kataliz və Qeyri-üzvi Kimya İnstitutunun baş direktoru akademik Dilqəm Tağıyev, bp-nin vitse-prezidenti Bəxtiyar Aslanbəyli çıxışlarında yeni açılan laboratoriyanın ölkədə elm və təhsillə yanaşı, sənayenin inkişafında böyük əhəmiyyətə malik olduğunu bildiriblər. Çıxışlarda qeyd olunub ki, bu, BDU-da elmi tədqiqatların keyfiyyətinin daha da artırılmasına, elmi işlərin kommersiyalaşdırılmasına da mühüm təsir göstərəcək.
Bölmənin digər xəbərləri
