BDU və Özbəkistan universitetləri arasında əməkdaşlığın yeni istiqamətləri formalaşır
Bakı, 25 avqust, AZƏRTAC
Bakı Dövlət Universitetinin (BDU) Özbəkistan ali təhsil müəssisələri ilə əməkdaşlığı jurnalistika və media, mədəni-humanitar əlaqələr, beynəlxalq tərəfdaşlıq, İKT və kibertəhlükəsizlik kimi yeni istiqamətləri də əhatə edir.
Bu barədə AZƏRTAC-a BDU-dan məlumat verilib.
Qeyd olunub ki, jurnalistika və media sahəsində də əlaqələr inkişaf etdirilir. Özbəkistan Jurnalistika və Kütləvi Kommunikasiya Universiteti ilə əməkdaşlığın genişləndirilməsi müzakirə olunub, II Azərbaycan–Özbəkistan Media Forumunun özbəkistanlı iştirakçıları BDU-da olublar. Bu əlaqələr media təhsili, jurnalistika və kommunikasiya sahəsində təcrübə mübadiləsi üçün yeni imkanlar yaradır.
BDU–Özbəkistan əməkdaşlığı mədəni-humanitar sahəni də əhatə edir. 2025-ci ildə Mirzə Uluqbəy adına Özbəkistan Milli Universitetinin nümayəndə heyəti BDU-da “The Identity of Uzbek Women” sərgisini təşkil edib. Belə tədbirlər iki ölkənin mədəni irsinin, ictimai həyatının və humanitar əlaqələrinin akademik mühitdə təqdim olunmasına xidmət edir.
BDU-nun Özbəkistanla əməkdaşlığı universitetin beynəlxalq mövqeyinin və akademik əlaqələr şəbəkəsinin genişləndirilməsi baxımından da əhəmiyyət daşıyır. 2025-ci ildə BDU-nun Daşkənddə “Study in Azerbaijan” təhsil sərgisində iştirakı universitetin təhsil proqramlarının, elmi imkanlarının və beynəlxalq əməkdaşlıq perspektivlərinin Özbəkistanda təqdim edilməsinə imkan yaradıb. Həmin ilin noyabrında rektor Elçin Babayevin rəhbərlik etdiyi BDU nümayəndə heyətinin Daşkənddə keçirilən “QS Eurasia Forum 2025”də iştirakı isə universitetlərarası əməkdaşlıq və beynəlxalq tərəfdaşlıqların inkişafı məsələlərinin müzakirəsinə şərait yaradıb.
2026-cı ildə əməkdaşlığın yeni istiqamətləri üzrə də konkret addımlar atılıb. Özbəkistanın Yer Elmləri Universiteti və Daşkənd Dövlət Özbək Dili və Ədəbiyyatı Universiteti ilə memorandumların imzalanması, Buxara Beynəlxalq Universitetinin rektorunun BDU-ya səfəri zamanı elm, akademik mübadilə, psixologiya və pedaqogika üzrə əməkdaşlıq imkanlarının müzakirəsi tərəfdaşlığın yeni sahələrə doğru genişləndiyini göstərir. Eyni zamanda, BDU tələbələrinin Özbəkistanda keçiriləcək “Cybersecurity CTF 2026” yarışında iştirakı İKT və kibertəhlükəsizlik sahəsində əlaqələrin də inkişaf etdiyini göstərir.
BDU qarşıdakı dövrdə Özbəkistanın aparıcı universitetləri və elmi-tədqiqat qurumları ilə əməkdaşlığın daha da genişləndirilməsini nəzərdə tutur. Prioritet istiqamətlər sırasında tələbə, doktorant, müəllim və tədqiqatçı mobilliyinin artırılması, mübadilə proqramlarının əhatə dairəsinin genişləndirilməsi, ikili diplom proqramlarının yaradılması, prioritet ixtisaslar üzrə birgə təhsil proqramlarının hazırlanması, birgə elmi-tədqiqat layihələrinin və beynəlxalq nəşrlərin sayının artırılması, birgə konfrans, seminar və dəyirmi masaların keçirilməsi, eləcə də gənc tədqiqatçılar üçün yeni əməkdaşlıq platformalarının yaradılması yer alır.
Azərbaycan və Özbəkistan arasında münasibətlərin bütün sahələrdə dinamik inkişaf etdiyi bir dövrdə ali təhsil və elm sahəsində qurulan institusional tərəfdaşlıqlar iki ölkənin akademik potensialının daha sıx inteqrasiyasına imkan verir. BDU-nun Özbəkistan universitetləri və elmi-tədqiqat qurumları ilə formalaşdırdığı geniş əməkdaşlıq şəbəkəsi bu prosesin mühüm tərkib hissəsidir.
Hazırkı nəticələr göstərir ki, BDU–Özbəkistan əməkdaşlığı ayrı-ayrı səfər və tədbirlərlə məhdudlaşmır. Tələbə, doktorant, müəllim və tədqiqatçı mübadiləsi, birgə təhsil proqramları, ikili diplom təşəbbüsləri, elmi nəşrlər, tədqiqat layihələri, beynəlxalq konfranslar və humanitar-mədəni layihələri əhatə edən davamlı institusional tərəfdaşlıq modeli formalaşır. Bu əməkdaşlığın daha da genişləndirilməsi Azərbaycan və Özbəkistan arasında strateji tərəfdaşlığın elm və təhsil müstəvisində möhkəmlənməsinə mühüm töhfə verəcək.
Bölmənin digər xəbərləri
