Bədii gimnastika üzrə Dünya Kubokunun ikinci günündə fərdi proqramda qaliblər müəyyənləşib
Komanda yarışlarında Azərbaycan millisi Dünya Kubokunun finalına yüksəlib
Bakı, 28 aprel, AZƏRTAC
Bakıda, Milli Gimnastika Arenasında keçirilən bədii gimnastika üzrə Dünya Kuboku yarışlarının ikinci günündə - aprelin 28-də fərdi proqramda qaliblər müəyyənləşib. Komanda yarışlarında isə Azərbaycan millisi Dünya Kubokunun finalına yüksəlib.
AZƏRTAC xəbər verir ki, çoxnövçülük üzrə təsnifat yarışlarında 13 ölkənin yığması arasında mübarizə aparan Azərbaycanın bədii gimnastika komandası 14,650 xalla səkkizinci yeri tutub. Komandamız iki gün ərzində çıxışlarının yekunlarına əsasən 31,800 xalla yeddinci olub və finala yüksəlib. Beləliklə, Azərbaycan gimnastika millisi aprelin 29-da baş tutacaq Dünya Kuboku yarışının final mərhələsinə vəsiqə qazanıb.
Çoxnövçülük yarışında İtaliya millisi 40,650 xalla birinci, Bolqarıstan yığması 38,400 xalla ikinci, Yaponiya komandası isə 35,550 xalla üçüncü yeri tutub.
Mükafatları qalib komandalara Azərbaycanın gənclər və idman nazirinin müavini İsmayıl İsmayılov, Beynəlxalq Gimnastika Federasiyasının (UEG) texniki məsələlər üzrə nümayəndəsi Kerolayn Hant, Ukrayna Bədii Gimnastika Federasiyasının vitse-prezidenti İrina Derugina və Azərbaycan Gimnastika Federasiyasının baş katibi Nurlana Məmmədzadə təqdim ediblər.
İtaliya komandası, həmçinin “AGF Trophy-2018” və Dünya Kuboku yarışlarının ən yüksək mükafatına layiq görülüb.
Çoxnövçülük yarışında Azərbaycan milli komandasının heyətində gimnastlarımızdan Ayşən Bayramova, Siyana Vasileva , Zeynəb Hümmətova, Aliyə Paşayeva və Diana Doman mübarizə aparıblar.
Fərdi proqramda isə çoxnövçülük (gürzlər və lent) yarışları başa çatıb. Yarışların “A” qrupunda çıxış edən gimnastlarımız Zöhrə Ağamirova və Veronika Hudis iki hərəkətin cəmində müvafiq olaraq 29,250 və 30,050 xal toplayıblar. Çoxnövçülük üzrə ümumi nəticədə V.Hudis 60,650, Z.Ağamirova isə 59,750 xal toplayaraq, müvafiq olaraq 12-ci və 17-ci yerlərdə qərarlaşıblar.
“A” və “B” qruplarında çıxış edən gimnastların ümumi nəticələrinin cəminə görə rusiyalı Maria Sergeyeva 69,050 xalla bütün rəqiblərini qabaqlayıb. Ukraynalı Vlada Nikolçenko 67,550 xalla gümüş, Belarus təmsilçisi Anastasiya Salos isə 66,550 xalla bürünc medala layiq görülüb.
Gimnastların mükafatlandırılması mərasimində medalları qaliblərə bədii gimnastika üzrə Azərbaycan yığmasının baş məşqçisi Mariana Vasileva , Gürcüstan Bədii Gimnastika Federasiyasının prezidenti Nelli Saladze və Beynəlxalq Gimnastika Federasiyasının (BGF) hakimlər üzrə nümayəndəsi Kerolayn Hant təqdim edib.
Bu il keçirilən Dünya Kuboku turniri mərhələlərində ən yaxşı nəticə göstərən İsrail gimnastı Linoy Aşram BGF-in xüsusi mükafatına layiq görülüb. L.Aşram Bakıda keçirilən sonuncu - dördüncü Dünya Kuboku yarışlarında iştirak etməsə də o, bu mükafata əvvəlki üç dünya kubokunun nəticələrinə əsasən layiq bilinib. Mükafat İsrail Gimnastika Federasiyasının nümayəndəsi Fira Voronova təqdim olunub.
Fərdi çoxnövçülük üzrə “Ən yüksək icra xalı” nominasiyasının qalibi isə Rusiya təmsilçisi Mariya Sergeyeva olub. “AGF Trophy” kubokunu ona Mariana Vasilyeva təqdim edib.
Bədii gimnastika üzrə Dünya Kuboku yarışlarında 26 ölkədən 127 gimnast mübarizəyə qoşulub. Onlardan 44-ü fərdi proqramda, 83-ü isə qrup komandalarının tərkibində çıxış edib. Turnirə aprelin 29-da yekun vurulacaq.
Bölmənin digər xəbərləri
