Belarusun paytaxtında MDB İcraiyyə Komitəsində ATƏT problematikasına dair XİN-lərarası məsləhətləşmələr olmuşdur
Minsk, 1 noyabr (AZƏRTAC). Cari il üçün MDB çərçivəsində Çoxsəviyyəli XİN-lərarası Məsləhətləşmələr Planına uyğun olaraq Belarusun paytaxtında Birliyin İcraiyyə Komitəsində ATƏT problematikasına dair məsləhətləşmələr olmuşdur. Bu barədə AZƏRTAC-a təşkilatın Minskdəki iqamətgahının Humanitar əməkdaşlıq, ümumsiyasi və sosial problemlər departamentindən bildirmişlər.
İclasın işində Azərbaycan (müşahidəçi kimi), Belarus, Qazaxıstan, Qırğızıstan, Rusiya Federasiyası, Tacikistan, Ukrayna (2013-cü ildə ATƏT-də sədrlik edən ölkə kimi) və Ermənistanın nümayəndə heyətləri iştirak etmişlər.
Məsləhətləşmələrin iştirakçıları aşağıdakı məsələləri müzakirə etmişlər: ATƏT çərçivəsində MDB-yə üzv dövlətlərin birgə fəaliyyəti, “Helsinki+40” prosesi, ATƏT XİNŞ-nin bu il dekabrın 5-6-da Kiyevdə keçiriləcək 20-ci görüşünə hazırlıq.
Beynəlxalq təşkilatlar, o cümlədən ATƏT çərçivəsində MDB-yə üzv dövlətlərin birgə fəaliyyətinin faydalı olduğu qeyd edilmişdir.
Tərəflər MDB İcraiyyə Komitəsinin və Birliyin Antiterror Mərkəzinin ATƏT-in Katibliyi ilə əməkdaşlığının inkişaf etdirilməsinin zəruri olduğunu bildirmişlər.
Zeynal Ağazadə
AZƏRTAC-ın xüsusi müxbiri
Minsk
Bölmənin digər xəbərləri
