Bakı, 4 noyabr, AZƏRTAC

Rəşid Behbudov adına Dövlət Mahnı Teatrında unudulmaz bəstəkar, Xalq artisti Cahangir Cahangirovun anadan olmasının 103 illiyi münasibətilə konsert proqramı təqdim edilib.

AZƏRTAC xəbər verir ki, konsertdə Mirxalid Salayevin rəhbərlik etdiyi teatrın instrumental ansamblının müşayiəti ilə bəstəkarın mahnılarını sənət ocağının solistləri ifa ediblər.

Əvvəlcə bəstəkarın həyat və yaradıcılığından söz açılıb, müəllifi olduğu musiqi əsərlərinin orijinallığı vurğulanıb. Bildirilib ki, bu il dahi şair Füzulinin 530 illiyi qeyd edilir və bəstəkarın "Füzuli" kantatası Cahangir Cahangirova böyük şöhrət gətirib.

Proqramda Xalq artistləri Gülyanaq və Gülyaz Məmmədovalar, Heydər Anatollu, solistlər Aynur İsgəndərli, Rövşən Qəhrəmanov, Fəxri Kazım Nicat və Ayşən Mehdiyeva bəstəkarın dillər əzbəri olan mahnılarını ifa ediblər. Həmçinin ansamblın ifasında bəstəkarın instrumental əsərləri də səsləndirilib.

Sonda bəstəkarın qızı Səidə Məhərrəmova çıxış edərək atasının xatirəsinə göstərilən ehtirama görə teatrın kollektivinə təşəkkürünü bildirib.

Qeyd edək ki, görkəmli bəstəkar Cahangir Cahangirov 1921-ci ildə Balaxanı kəndində anadan olub. A.Zeynallı adına Bakı Musiqi Məktəbində, Azərbaycan Dövlət Konservatoriyasında təhsil alıb. 1949-cu ildən başlayaraq C.Cahangirov Azərbaycan radiosunun nəzdində yaradılan xora rəhbərlik edərək 15 ildən artıq bu kollektivlə işləyib. Onun yazdığı mahnıların çoxu ilk dəfə həmin kollektivin ifasında səslənib.

Cahangir Cahangirov həm də Azərbaycan Dövlət Filarmoniyası nəzdindəki Mahnı və Rəqs Ansamblının bədii rəhbəri vəzifəsində çalışıb. Bəstəkarın xor və instrumental musiqiləri, operaları, bir-birindən gözəl mahnıları var. Bunlara misal olaraq, bəstəkarın xor musiqisi sahəsində maraqlı əsərlərindən "Arazın o tayında" poemasını, 12 hissədən ibarət "Dostluq mahnısı" kompozisiyasını, "Azad" və "Xanəndənin taleyi" operalarının xor nömrələrini, "Füzuli", "Nəsimi", "Aşıq Alı" kantatalarını, "Sabir" oratoriyasını, Süleyman Ələsgərovla birlikdə yazdığı odanı, onlarca xor miniatürlərini göstərmək olar. Bəstəkar vaxtaşırı Füzuli şeiriyyatından ilhamlanaraq ürəyəyatımlı əsərlər bəstələyib. Bu baxımdan onun Füzulinin qəzəllərinə bəstələdiyi vokal miniatürlərini, "Eşitməzdim" qəzəl-romansı vurğulamaq olar.

Xalq artisti Cahangir Cahangirov 1992-ci ilin mart ayında dünyasını dəyişib. Fəxri xiyabanda dəfn olunub.