Bəxtiyar Quliyev: Bu il Azərbaycanda stronqmen idmanı üzrə beynəlxalq festival təşkil olunacaq
Bakı, 16 yanvar, AZƏRTAC
Azərbaycan Stronqmen Federasiyasının (ASF) prezidenti Bəxtiyar Quliyev idmanın bu növünün ölkəmizdə inkişaf perspektivləri barədə AZƏRTAC-ın müxbirinin suallarını cavablandırıb. Müsahibəni təqdim edirik.
- Bəxtiyar müəllim, ötən ili Azərbaycan Stronqmen Federasiyası üçün necə qiymətləndirirsiniz?
- Ötən il federasiyamız üçün çox uğurlu olub. Qarşıya qoyulan bütün məqsədlərə nail olduq. İlin əvvəlində ölkə çempionatının ilk mərhələsi keçirilib. Azərbaycan Texniki Universitetinin idman zalında təşkil olunan yarışa gözlədiyimizdən də artıq iştirakçı qatıldı. Belə ki, 40-dək idmançı birincilik uğrunda mübarizə apardı. Mayda Bakı Su İdmanı Sarayının ərazisində digər yarışımız - “Caspian Power Show” təşkil olundu. Bu il həmin yarış festival formatında təşkil ediləcək. İstəyirik ki, festivalda bir neçə idman növü, xüsusən stronqmenə yaxın olan güc idman növləri təmsil olunsun. Əgər digər idman növlərindən də təklif gələrsə, biz onu dəyərləndirməyə hazırıq. Festival stronqmenin kütləviliyinin təmin olunmasına xidmət edəcək və gələcəkdə sıralarımızın genişlənməsinə yeni imkanlar açacaq. Tədbir çərçivəsində stronqmen üzrə Avropa çempionatı da olacaq. Festival idman yarışları ilə yanaşı, sahibkarlar üçün yeni əməkdaşlıqların qurulmasında böyük rol oynayacaq. Beynəlxalq təcrübədə belə yarışlar var. Tədbir zamanı idman geyimi, avadanlığı və qidaları şirkətləri öz stendləri ilə təmsil olunacaqlar. Bu “expo yarışlar” adlanır və mən həmin festivallarda iştirak etmişəm.
Artıq festivalın hazırlığına start verilib. Yaxın günlərdə festivalın rəqəmsal videoçarxı hazırlanaraq ictimaiyyətə təqdim olunacaq. İndidən deyim ki, bu mükəmməl bir yarış olacaq. Azərbaycan Ciu-cutsu Federasiyası ilə danışıqlarımız müsbət yekunlaşıb və idmanın bu növü festivalda yer alacaq. Ulu öndər Heydər Əliyevin xatirəsinə həsr olunacaq beynəlxalq festivalın ənənəvi xarakter alması idmançılarımızın peşəkarlıq səviyyəsinin artmasına xidmət göstərəcək.
Bundan başqa, idmançılarımız müxtəlif tədbirlərdə iştirak ediblər. Gənclər və İdman Nazirliyinin təşkilatçılığı ilə 5 mart - Bədən Tərbiyəsi və İdman Gününə həsr olunmuş festivalda millimizin üzvləri nümunəvi çıxışları ilə iştirakçılara xoş anlar yaşadıblar. Həmçinin oktyabrda ölkə çempionatının növbəti mərhələsi yüksək səviyyədə təşkil olunub.
- ASF-in beynəlxalq qurumlarla əməkdaşlığı barədə nə deyə bilərsiniz?
- Hazırda dünyada stronqmen üzrə 4 beynəlxalq qurum fəaliyyət göstərir. Bunlardan ikisi kommersiya xarakterlidir. Biz əsasən, Dünya Stonqmen Federasiyası ilə əməkdaşlıq edirik. Həmçinin qədim idman növlərinin inkişafını nəzərdə tutan “Ethnosport” təşkilatı ilə də sıx münasibətimiz var. Təşkilatın prezidentinin Bakıya səfəri zamanı fikir mübadiləsi apardıq. Bir müddət əvvəl “Ethnosport”un rəhbərliyi Asiya Oyunlarının təşkilatçı qurumu olan “Accord Sport” ilə əməkdaşlıq müqaviləsi imzalayıb. Həmçinin Türkiyədə də bu tipli yeni idman qurumu yaradılıb. Artıq onlar Türkiyədə yarış da təşkil ediblər. Onlarla da əməkdaşlığa başlamağa hazırlaşırıq.
Cari ildə Bakıda təşkil olunacaq festivala Dünya Stronqmen Federasiyasının reytinq cədvəlində ilk pillələrdə qərarlaşan idmançılar dəvət ediləcəklər. Bu da yarışın gərgin idman mübarizəsi şəraitində keçəcəyindən xəbər verir. Həmçinin bu ilin yayında “Ethnosport”un təşkilatçılığı ilə Azərbaycanın bölgələrinin birində yarışın təşkili nəzərdə tutulub. Belə ki, bu yarışda pəhləvanlarımızın iştirakı planlaşdırılır. Pəhləvanlarımız ölkədaxili bütün yarışlara dəvət olunurlar. Hazırda ölkəmizdəki pəhləvanlar Mədəniyyət Nazirliyində qeydiyyatdan keçiblər. Artıq ASF fəaliyyət göstərdiyi üçün mən onları federasiyamıza üzv olmağa çağırıram.
- İdmanın bu növünün Olimpiya Oyunlarının proqramına salınma ehtimalı varmı?
- Düşünürəm ki, yaxın gələcəkdə stronqmen Olimpiya Oyunlarının proqramına daxil edilə bilər. Bunun üçün müxtəlif çəkilər və hərəkətlər təsdiqlənib qəbul olunmalıdır. Bizim bu haqda Nizamnaməmiz var. Bu istiqamət üzrə fəaliyyətimizi davam etdiririk. Yaxın vaxtlarda atletlərimizə idman ustalığına namizəd, idman ustası və beynəlxalq dərəcəli idman ustası adlarını təqdim edəcəyik.
- Stronqmen idman növünün bölgələrdə inkişafı istiqamətində hansı addımlar atılır?
- Quba, Gəncə, Tovuz, Qazax və Mingəçevirdə bölmələrimiz fəaliyyət göstərir. İdmanın bu növü ilə maraqlananlar bölmələrə müraciət edirlər. Hazırda cənub bölgəsində bölmələrin yaradılması haqqında razılıq əldə olunub. Federasiyamız 2017-ci ilin ortalarından yaradılsa da, əsas fəaliyyətə ötən ildən başlamışıq. İdmanın bu növü üzrə kütləviliyə nail olmaq üçün yollar axtarırıq. Fikirləşirik ki, klublararası yarışlar təşkil edək. Hər həftə bir mərhələsi keçiriləcək yarışa marağın böyük olacağına ümid edirəm.
İdmançıların çoxluğu sağlam rəqabətdən xəbər verir. Əgər perspektivli idmançılarımız çox olsa, biz də onların arasında beynəlxalq arenada ölkəmizi layiqincə təmsil edə biləcək daha güclüləri seçə bilərik. Bakıda mütəmadi olaraq idmançılar üçün seminarlar təşkil edilir. Tanınmış idmançıların iştirakı ilə bölgələrdə də seminarlar keçirməyi planlaşdırırıq.
- Peşəkar stronqmen idmançısı olmaq üçün hansı keyfiyyətlər üstün götürülür?
- Əsasən güc, dözümlülük və elastiklik. Bəzən elə hərəkətlər olur ki, onu hündürboylu idmançılar daha asan yerinə yetirirlər. Əvvəlcə əzələlərin elastikliyini inkişaf etdirmək üçün dartma fəndləri yerinə yetirilməlidir. Ümumiyyətlə, peşəkar idmançı olmaq üçün illər lazımdır. Təcrübə də mütləqdir. Bununla yanaşı, idmançı yarışa psixoloji cəhətdən də hazır olmalıdır. Bütün bunların əsasında peşəkar məşqçi amili dayanır.
Hazırda dünyada ən məşhur stronqmenlər Zadrunas Saviçkas və Mariuz Podzianovskidir. Dünya rekordu isə ingiltərəli Edi Holla məxsusdur. Hazırda İngiltərədə idmanın bu növü sürətlə inkişaf edir. Əvvəllər stronqmen ABŞ-da daha çox yayılmışdı. Həmçinin Skandinaviya ölkələri, Polşa, Çexiya, Bolqarıstanda da idmanın bu növü çox populyardır.
Bölmənin digər xəbərləri
