Beynəlxalq Abidələr və Tarixi Yerlər Günü münasibətilə mediatur və seminar təşkil olunub
Qobustan, 18 aprel, Mikayıl Məmmədov, AZƏRTAC
Hər il aprelin 18-də Beynəlxalq Abidələr və Tarixi Yerlər Günü qeyd olunur.
AZƏRTAC xəbər verir ki, bu münasibətlə Mədəniyyət Nazirliyi Qobustan Dövlət Tarix-Bədii Qoruğunda tarixi abidələrlə tanışlıq və ictimaiyyətin diqqətini onların qorunub saxlanmasının vacibliyinə cəlb etmək məqsədilə mediatur təşkil edib. Tədbirdə mühafizə olunan abidələrin qorunması, tədqiqi və təşviqi istiqamətində aparılan işlər barədə media nümayəndələrinə ətraflı məlumat verilib.
Mediatur zamanı Mədəniyyət Nazirliyinin Mədəni İrsin Qorunması, İnkişafı və Bərpası üzrə Dövlət Xidmətinin Mədəni irsin qorunması şöbəsinin müdiri Səbuhi Bəşirov jurnalistlərə müsahibəsində mədəni irsin qorunması və bərpasının əhəmiyyətindən danışıb:
"Hər il olduğu kimi, bu il də Mədəniyyət Nazirliyinin təşəbbüsü ilə müxtəlif tədbirlər keçirilir. Qeyd etmək istərdim ki, ötən il də COP29 layihəsi çərçivəsində aprelin 18-də 29 abidədə tədbirlər təşkil olunub. Bu il tarix-mədəniyyət qoruqlarında da müxtəlif tədbirlər keçirilir", - deyə şöbə müdiri qeyd edib.
Səbuhi Bəşirov işğaldan azad edilmiş ərazilərdə mədəni irsə dəymiş ziyanla bağlı statistik məlumat da verib: “Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti işğaldan azad edilmiş ərazilərdə tarix və mədəniyyət abidələrinə dəymiş ziyanla bağlı genişmiqyaslı monitorinq keçirib.
Ümumilikdə, 434 abidə zərər görüb. Bunlardan 68-i tamamilə, 114-ü isə qismən məhv edilib. Ermənistanın işğalı zamanı Azərbaycanın mədəni irsinə dəymiş maddi ziyan 700 milyon manatdan çoxdur. Bu məlumat beynəlxalq təşkilatlara da göndərilib. Hazırda bununla bağlı iş aparılır”, - deyə Səbuhi Bəşirov bildirib.
Qobustan Milli Tarix-Bədii Qoruğunun direktoru Vüqar İsayev jurnalistlərə açıqlamasında Beynəlxalq Abidələr və Tarixi Yerlər Gününün ölkəmizin mədəni irsinin qorunması baxımından əhəmiyyətindən danışıb: “Beynəlxalq Abidələr və Tarixi Yerlər Günü bütün dünyada geniş qeyd olunur, bununla əlaqədar Azərbaycan mədəniyyət nazirinin müvafiq əmrinə əsasən, ölkənin mədəniyyət müəssisələrində və qoruqlarında “açıq qapı” günü elan edilib.
Bu gün Qobustan qoruğu da həmin təşəbbüs çərçivəsində öz fəaliyyətini qurub. Bu gün mindən çox insan qoruğumuzu ziyarət edib. Xüsusilə sevindirici haldır ki, ziyarətçilərin əksəriyyətini məktəblilər, təhsil müəssisələri tərəfindən mütəşəkkil şəkildə gətirilən uşaqlar təşkil edir.
Xüsusilə qeyd etmək lazımdır ki, Qobustan qoruğunun dəvəti ilə tədbirdə Ələt kəndində yerləşən sağlamlıq imkanları məhdud uşaqlar üçün məktəblərin şagirdləri iştirak ediblər. Onlar üçün qoruğa ekskursiya təşkil olunub.
Həm Qobustanın özü, həm də bütün tarixi abidələr üçün bu əlamətdar günün əhəmiyyəti çox böyükdür. Məqsədimiz abidələrin qorunmasının vacibliyini geniş auditoriyaya çatdırmaq, onların populyarlaşdırılması və maarifləndirilməsi istiqamətində iş aparmaqdır. Çalışırıq ki, Azərbaycan vətəndaşları öz güclərini birləşdirərək mədəniyyətimizin, tariximizin, irsimizin qorunub saxlanmasına öz töhfəsini versin”, - deyə Vüqar İsayev bildirib.
Həmçinin Qobustan Dövlət Tarix-Bədii Qoruğunda Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti və Azərbaycan Milli Elmlər Akademiyasının Arxeologiya və Antropologiya İnstitutunun birgə təşkil etdikləri “Azərbaycanın arxeoloji irsinin qorunması” mövzusunda elmi-praktik seminar keçirilib.
Qeyd edək ki, bu əlamətdar gün 1983-cü ildə Abidələr və Tarixi Yerlər üzrə Beynəlxalq Şuranın (ICOMOS) təşəbbüsü, UNESCO-nun dəstəyi ilə təsis edilib. Məqsəd insanların diqqətini abidələrin və tarixi ərazilərin mühafizəsinə cəlb etməkdir.
Bu əlamətdar gün ölkəmizdə də geniş qeyd olunur: qoruqlarda və tarixi məkanlarda abidələrin və tarixi yerlərin mühafizəsinin təbliğinə yönəlmiş müxtəlif tədbirlər, sərgilər təşkil olunur.
Ənənəyə sadiq qalaraq, bu il də tarixi məkanlarda Beynəlxalq Abidələr və Tarixi Yerlər Gününə həsr olunmuş müxtəlif tədbirlər keçirilir. Bundan əlavə, Mədəniyyət Nazirliyinin tabeliyində olan qurumlarda, tarix-mədəniyyət qoruqlarında və muzeylərdə “açıq qapı” günü təşkil olunub və aprelin 18-də onlara giriş ziyarətçilər üçün ödənişsizdir.
Bölmənin digər xəbərləri
