Beynəlxalq “Ənənələr və müasirlik” Təsviri İncəsənət Festivalında Azərbaycan da təmsil olunacaq
Bakı, 21 may, AZƏRTAC
Mayın 26-da Moskvanın “Manej” sərgi zalında 10-cu Beynəlxalq “Ənənələr və müasirlik” Təsviri İncəsənət Festivalı keçiriləcək.
AZƏRTAC buro247.az saytına istinadla xəbər verir ki, ölkəmizi bu festivalda gənc rəssam Deləfruz Bağırova təmsil edəcək.
2007-ci ildən başlayaraq hər il keçirilən festival dünyanın müxtəlif ölkələrindən olan rəssamları birləşdirir, gənc istedadlara tanınmış pedaqoqlar və mədəniyyət xadimləri ilə təcrübə mübadiləsi etmək imkanı verir. “Biz bütün tendensiya və istiqamətləri toplamaq, rəssamlar, kolleksionerlər və sənətşünaslar arasında ünsiyyət üçün meydança yaratmaq istəyirik. Hazırda biz festivala dünyanın 40 ölkəsindən olan rəssamların 300-dən çox sənət əsərlərini təqdim etməyi planlaşdırırıq”, - deyə festivalın kuratoru Vera Kiselyova bildirib.
Festival çərçivəsində təsviri incəsənət sahəsində yaradıcılıq, sevgi və uğura inamı simvolizə edən bürünc heykəlcik olan beynəlxalq “VERA” mükafatı təqdim ediləcək. Mükafat rəssamlıq, qrafika, tətbiqi incəsənət, fotoqrafiya, heykəltəraşlıq, installyasiya və muzey işi üzrə qaliblərə veriləcək.
Münfislər heyətinin sədri Tahir Salahovdur.
Festival mayın 31-dək davam edəcək.
Bölmənin digər xəbərləri
