BEYNƏLXALQ HÜQUQİ ƏMƏKDAŞLIĞA TÖHFƏ
Bu günlərdə Parisdə 100-dən çox dövlətin 550-yə yaxın nümayəndəsinin, o cümlədən prokurorluq, ədliyyə və digər hüquq mühafizə orqanlarının rəhbər şəxslərinin iştirakı ilə Beynəlxalq Prokurorlar Assosiasiyasının illik konfransı və İcraiyyə Komitəsinin iclası keçirilmişdir. Tədbirlərdə ölkəmizi Assosiasiyanın İcraiyyə Komitəsinin üzvü, ədliyyə naziri Fikrət Məmmədovun rəhbərliyi ilə nümayəndə heyəti təmsil etmişdir.
Konfransda terrorçuluq və iqtisadi cinayətlərə qarşı mübarizə, hakimlərin və prokurorların müstəqilliyi, məhkumların reabilitasiyası və digər aktual məsələlər müzakirə edilərək, faydalı təcrübə mübadiləsi aparılmışdır.
İcraiyyə Komitəsinin iclasında assosiasiyaya yeni dövlətlərin üzv qəbul edilməsi məsələlərinə baxılmış, təşkilatın fəaliyyətinin təkmilləşdirilməsi, onun qəbul etdiyi sənədlərin səmərəliliyinin artırılması müzakirə olunmuş və ədalət mühakiməsinin həyata keçirilməsində metodiki yardım baxımından bütün ölkələr üçün böyük praktiki əhəmiyyət kəsb edən İnsan hüquqları üzrə Rəhbər Tövsiyələrin və hüquqi yardıma dair Təlimat Kitabçasının MDB üzvü olan və digər dövlətlər arasında yayılması məqsədi ilə tərəfimizdən Azərbaycan və rus dillərinə tərcümə olunması yüksək qiymətləndirilmişdir.
Səfər zamanı Fransanın ədliyyə naziri, habelə Rusiya, Avstriya, Danimarka, Çin və başqa dövlətlərin ədliyyə, prokurorluq və digər hüquq-mühafizə orqanlarının rəhbər işçiləri ilə işgüzar görüşlər keçirilmiş, təcrübə mübadiləsi aparılaraq, qarşılıqlı əməkdaşlığa dair faydalı danışıqlar keçirilmişdir.
Bölmənin digər xəbərləri
