BEYNƏLXALQ KONFRANS BAŞA ÇATMIŞDIR
38 ölkənin gömrük xidmətlərinin və 6 beynəlxalq təşkilatın rəhbərlərinin iştrak etdiyi və ÜGT-nin Avropa regionu üzrə sədr müavini, Macarıstan Gömrük və Maliyyə Mühafizəsinin komissarı Yanoş Nacın sədrlik etdiyi konfransın işi ÜGT-nin Baş katibi Mişel Danenin “Saxtakarlığa və Piratçılığa qarşı mübarizədə 2-ci Qlobal konqresin yekunu, saxtakarlığa və pirat mallara qarşı mübarizədə ÜGT-nin apardığı iş” barəsində təqdimatı ilə davam etdirilmişdir.
Finlandiya Gömrük İdarəsinin baş direktoru Tapani Erlinq sərhəd əməkdaşlığına dair bu il Finlandiyada keçiriləcək yüksək səviyyəli Gömrük Konfransına hazırlıqla bağlı məlumat vermiş, Cənub-Şərqi Avropa Əməkdaşlıq Təşəbbüsü üzrə Mərkəzin (SECİ) direktoru Mitya Moçnikin “Sərhəd keçidi üzrə mütəşəkkil cinayətkarlığa qarşı mübarizədə SECİ-nin fəaliyyəti”, Avropa Gömrüyünün direktoru Martin Braunun “Texniki yardım, Pul üçün dəyər”, Çexiya Respublikası Gömrük İdarəsi baş direktorunun müavini xanım Vendulka Holanın “ÜGT-nin Hermanisdə Regional Kinoloji Mərkəzi və narkotik maddələri axtaran itlərin Avropa birinciliyinin gələcəyi” mövzusunda çıxışları ətrafında müzakirələr aparılmışdır.
ÜGT-nin baş katibi Mişel Dane Azərbaycanın bir qrup fərqlənən gömrük əməkdaşına ÜGT-nin sertifikatlarını, Dövlət Gömrük Komitəsinin sədri Kəmaləddin Heydərov isə bir sıra ölkələrin gömrük xidmətlərinin rəhbərlərinə “Gömrük əməkdaşlığının möhkəmləndirilməsinə görə” döş nişanlarını təqdim etmişdir.
Konfransın yekununda Dövlət Gömrük Komitəsinin sədri Kəmaləddin Heydərov çıxış edərək bildirmişdir ki, Bakı konfransı Ümumdünya Gömrük Təşkilatına üzv olan ölkələrin gömrük xidmətləri və beynəlxalq təşkilatlar arasında əməkdaşlığın daha da dərinləşməsinə və inkişaf etdirilməsinə şərait yaratmış, iştirakçılar arasında dostluq münasibətlərinin möhkəmləndirilməsinə səbəb olmuşdur. Bu konfrans gömrük xidmətlərimiz arasında səmərəli əməkdaşlığın inkişafı üçün çox əhəmiyyətlidir. Tədbirdə Dövlət Gömrük Komitəsinin tutduğu mövqe ölkələrimizin gömrük idarələri arasında əməkdaşlığa əlavə impuls verməklə, gömrük işinin gələcəkdə daha da genişləndirilməsinə yardımçı olacaqdır. Kəmaləddin Heydərov vurğulamışdır ki, geniş müstəvidə əməkdaşlığa, qarşılıqlı anlaşmaya, dostluq münasibətlərinin inkişafına istiqamətlənən bu tədbir hər birimiz üçün əhəmiyyətli hadisə oldu.
Ümumdünya Gömrük Təşkilatının Baş katibi Mişel Dane Bakı konfransının yüksək səviyyədə təşkilində və keçirilməsində göstərdiyi dəstəyə görə ölkəmizin başçısı, Prezident İlham Əliyevə təşəkkürünü bildirmiş, konfransın qarşısına qoyduğu məqsədə nail olduğunu razılıqla dilə gətirmişdir.
Konfransa sədrlik edən Macarıstan Gömrük Xidməti və Maliyyə Mühafizəsinin komissarı yüksək səviyyəli tədbirin Bakıda keçirilməsindən razılıqla söhbət açaraq, ölkələrarası və beynəlxalq gömrük əməkdaşlığının dərinləşməsində Dövlət Gömrük Komitəsinin fəaliyyətini yüksək qiymətləndirmişdir.
Sonra Macarıstan Respublikası Gömrük və Maliyyə Mühafizəsi və Azərbaycan Respublikası Dövlət Gömrük Komitəsi arasında əməkdaşlıq haqqında Protokol imzalanmışdır. Protokola əsasən, tərəflər qarşılıqlı bilik və təcrübə mübadiləsi vasitəsilə hər iki gömrük idarəsi arasında əməkdaşlığı inkişaf etdirmək və gücləndirmək, eləcə də hər iki təşkilatın fəaliyyətinin səmərəliliyinə yardım etmək barədə razılığa gəlmişdir.
Sonda mətbuat konfransı keçirilmiş, jurnalistlərin suallarına aydınlıq gətirilmişdir.
Konfrans iştrakçıları ÜGT-nin Bakıdakı Regional Tədris Mərkəzi və DGK-nın Kinoloji Mərkəzinin işi ilə də tanış olmuşlar.
Bölmənin digər xəbərləri
