BEYNƏLXALQ SİMPOZİUMUN İŞTİRAKÇILARI İÇƏRİŞƏHƏRLƏ TANIŞ OLMUŞLAR
AZƏRTAC xəbər verir ki, Bakıda Yaponiya-Rusiya Tarixi Əlaqələri Araşdırma Mərkəzinin təşəbbüsü və Azərbaycan hökumətinin təşkilati dəstəyi ilə məşhur kəşfiyyatçı Rixard Zorgenin həyat və fəaliyyətinə həsr edilmiş “Dünya tarixində Rixard Zorgenin rolu” mövzusunda V beynəlxalq simpoziumun iştirakçıları sentyabrın 23-də İçərişəhərlə tanış olmuşlar.
“İçərişəhər” Dövlət Tarix-Memarlıq Qoruğu İdarəsinin rəisi Kamran İmanov qonaqlara məlumat vermişdir ki, Azərbaycan Prezidentinin 2005-ci il 10 fevral tarixli Sərəncamı ilə “İşərişəhər” Dövlət Tarix-Memarlıq Qoruğu İdarəsi yaradılmışdır. Ümumiyyətlə ötən əsrlərin yadigarları olan abidələrin qorunması və bərpası dövlətimizin daim diqqət mərkəzindədir.
Sonra qonaqlar tanınmış xalça ustası, xalq rəssamı Kamil Əliyevin xalça muzeyində olmuş, onun əsərlərinə maraqla tamaşa etmişlər. Onlar burada türk dünyasının dahi şəxsiyyətləri ümummilli lider Heydər Əliyevin və Mustafa Kamal Atatürkün, Azərbaycan mütəfəkkirləri Nizami Gəncəvinin, Məhəmməd Füzulinin, İmadəddin Nəsiminin, böyük rus şairi Aleksandr Puşkinin və başqalarının portretləri toxunmuş xalçalarla yaxından tanış olmuşlar. Qonaqlara Azərbaycan xalçaları haqqında geniş məlumat verilmişdir.
Simpozium iştirakçıları Qız qalası haqqında da ətraflı məlumat əldə etmişlər.
Qonaqlara İçərişəhərlə bağlı kitablar hədiyyə edilmişdir.
######
Bölmənin digər xəbərləri
