“BIAF-2025” festivalı zəngin proqram və janr rəngarəngliyi vəd edir
Bakı, 28 oktyabr, Günel Alıyeva, AZƏRTAC
Bakı Beynəlxalq İncəsənət Festivalı (“BIAF-2025”) ərəfəsində Azərbaycan paytaxtında mətbuat konfransı keçirilib.
AZƏRTAC xəbər verir ki, tədbirdə ölkənin mədəni həyatının inkişafında yeni bir mərhələni qeyd etmək üçün nəzərdə tutulan bu qəbildən ilk festivalın missiyası, proqramı və əsas tədbirləri təqdim olunub.
Üzeyir Hacıbəyli adına Azərbaycan Dövlət Simfonik Orkestrinin bədii rəhbəri və baş dirijoru, Bakı Beynəlxalq İncəsənət Festivalının fəxri səfiri Fuad İbrahimov qeyd edib ki, belə festivalların keçirilməsi hər bir ölkənin mədəni həyatında mühüm rol oynayır. O bildirib ki, bu tədbirlər yaradıcı insanları bir araya gətirir, bədii səhnəni canlandırır və Azərbaycanın mədəni imicinin möhkəmlənməsinə töhfə verir.
Maestro qarşıdan gələn festivalın zəngin proqram və janr müxtəlifliyi ilə fərqlənəcəyini vurğulayıb. BIAF-da klassik konsertlər, teatr və xoreoqrafiya tamaşaları, həmçinin müxtəlif sənət sahələrini bir araya gətirən fənlərarası layihələr təqdim olunacaq.
Dirijorun sözlərinə görə, açılış mərasimi oktyabrın 31-də keçiriləcək və həmin gün Üzeyir Hacıbəyli adına Simfonik Orkestrin çıxışı olacaq. Konsert proqramına Dmitri Şostakoviçin əsərləri, “Don Kixot” süitası və Pyotr Çaykovskinin monumental konserti daxil ediləcək.
Fuad İbrahimov əlavə edib ki, festivalda tanınmış dirijor Əziz Şoxakimovun çıxışı da gözlənilir və bu, Bakı tamaşaçıları üçün xüsusi musiqi tədbiri olacaq.
Öz növbəsində, bəstəkar və ifaçı Aysel Məmmədova (AISÉL) bir neçə görkəmli sənətkarın öz əsərlərini ilk dəfə Bakıda təqdim edəcəyini vurğulayıb. Onun sözlərinə görə, hətta Avropa tamaşaçıları da hələ bu tamaşaları görmək imkanı əldə etməyiblər. Müğənni bildirib ki, bu, festivala xüsusi dəyər verir və onu həm milli, həm də beynəlxalq səviyyədə böyük maraq doğuran bir tədbirə çevirir.
Mətbuat konfransı zamanı Bakıda ilk dəfə tamaşaçılara təqdim olunacaq tamaşalara xüsusi diqqət yetirilib. Onlardan biri dünyaca məşhur xoreoqraf Şaron Eyalın “Delay the Sadness” (“Kədəri gecikdir”) əsəri olacaq. Bu əsərin premyerası sentyabr ayında Almaniyada keçirilən nüfuzlu musiqi və incəsənət festivalı olan Rur triennalesində baş tutub. Bakıdakı təqdimat tamaşanın BIAF-da ikinci dəfə nümayiş olunacağı deməkdir.
Ssenarist və dramaturq İsmayıl İman qeyd edib ki, Şaron Eyalın əsəri hərəkət və duyğuların əlamətdar bir əlkimyasıdır. “Delay the Sadness” sadəcə bir rəqs deyil, həm də tamaşaçıların sənətçilərlə birlikdə yaşadığı bir təcrübədir. Bir ssenarist və dramaturq kimi, bu tamaşa mənim üçün müasir rəqsin fəlsəfə və modanın kəsişməsində necə yarandığını görmək üçün yaxşı fürsətdir”, - deyə o vurğulayıb.
Həmçinin noyabrın 4-də Şaron Eyalın truppasının Azərbaycan rəqs sənayesinin nümayəndələri üçün müasir xoreoqrafiya üzrə ustad dərsi keçirəcəyi açıqlanıb.
Bakı Beynəlxalq İncəsənət Festivalı 31 oktyabr - 16 noyabr tarixlərində dəstəyi ilə keçiriləcək. Bakının aparıcı səhnələrində dünyaca məşhur rejissorlar, xoreoqraflar və teatr truppalarının, o cümlədən Geshеr Teatrının, Şaron Eyalın, Robert Lepajenin, Daniele Fintsi Paskanın, Yan Lipin, Qiyom Kotenin, Rimas Tuminasın və digər görkəmli sənətçilərin tamaşaları nümayiş etdiriləcək.
Bölmənin digər xəbərləri
