“BibiHeybətneft” NQÇİ-nin mədən ərazisindəki yaşıllıq sahələrində mövsümi işlər geniş vüsət almışdır
Bakı, 28 mart (AZƏRTAC). “Ekol Mühəndislik Xidmətləri” Qapalı Səhmdar Cəmiyyətinin (QSC) Torpaqların Rekultivasiyası Departamentinin (TRD) “BibiHeybətneft” Neft-Qaz Çıxarma İdarəsinin (NQÇİ) mədən ərazilərində və aqrotexniki xidmət göstərdiyi yaşıllıq sahələrində mövsümi işlər geniş vüsət almışdır.
AZƏRTAC xəbər verir ki, TRD-nin 3-cü sahəsinin xidmət göstərdiyi “BibiHeybətneft” NQÇİ-nin mədən ərazisində mövsümi işlərlə əlaqədar, yaşıllıq sahəsindəki damcı suvarma sistemində profilaktiki təmiri, eləcə də ağacların diblərinin boşaldılması, budanması, bitkilərə gübrələrin verilməsi işləri başa çatdırılmışdır. Hazırda sahələrin alaq otlarından təmizlənməsi işləri yerinə yetirilir.
Qeyd edək ki, TRD-nin 3-cü sahəsi bu ərazidə 49 mindən çox ağac və kola xidmət göstərir. Ərazidə 320 kvadratmetrlik istixana kompleksi tikilərək ilin əvvəlində istifadəyə verilmiş və istixanaya 11 minə qədər müxtəlif bitki növləri əkilmişdir.
Yaz mövsümündə istixanada yetişdirilmiş 650 ədədə qədər müxtəlif növ ağac və kol bitkiləri çıxarılaraq sahəyə və dibçəklərə əkilmiş, bu bitkilərə aqrotexniki qulluq göstərilməsinə başlanılmışdır. TRD-nin 3-cü sahəsinin əməkçiləri “BibiHeybətneft” NQÇİ-nin mədən ərazisindəki yaşıllıq sahələrində zəruri aqrotexniki tədbirlərin həyata keçirilməsini davam etdirir.
Bölmənin digər xəbərləri
