Birinci Qarabağ müharibəsinin itkin şəhidi Lətif Şahhüseynov Sumqayıtda torpağa tapşırılıb VİDEO
Sumqayıt, 28 oktyabr, Göyçək Mahmudlu, AZƏRTAC
Birinci Qarabağ müharibəsinin daha bir itkin şəhidi – Lətif Qəribalı oğlu Şahhüseynov oktyabrın 28-də Sumqayıt Şəhidlər xiyabanında dəfn olunub.
AZƏRTAC xəbər verir ki, dəfn mərasimində şəhidin ailə üzvləri, Müdafiə və Daxili İşlər nazirliklərinin əməkdaşları, Sumqayıt Şəhər İcra Hakimiyyətinin nümayəndələri, Milli Məclisin deputatları, müharibə veteranları, şəhid ailələri və sakinlər iştirak ediblər.
İtkin şəhid yaylım atəşi və hərbi orkestrin müşayiəti ilə Dövlət Himnimizin sədaları altında torpağa tapşırılıb. Şəhidin ruhuna dualar oxunub, məzarının üzərinə əklil qoyulub, gül dəstələri düzülüb.
Tabutun büküldüyü Azərbaycanın Dövlət Bayrağı şəhidin yaxınlarına təqdim olunub.
Şəhidin bacısı Mələk Şahhüseynova bildirib ki, qardaşı Vətənin dar günündə Sumqayıt Hərbi Komissarlığından hərbi xidmətə çağırılıb. Əvvəlcə Yevlaxa, oradan da döyüş bölgəsinə yollanıb. Xocavənd istiqamətində isə itkin düşüb: “Lətifi Zaqatalada başqa bir ailə öz şəhidi kimi dəfn edibmiş. Həmin ailə hər önəmli tarixdə onun məzarını ziyarət edib, öz şəhidləri kimi ehtiramını saxlayırmış: Lakin onların daxilində məzardakı şəhidin onlara aid olmamasına dair şübhələr var imiş. Nəhayət ki, uzun illərdən sonra bununla bağlı aidiyyəti qurumlara müraciət ediblər. DNT analizləri nəticəsində nəşin qardaşım, Birinci Qarabağ müharibəsinin itkin şəhidi Lətif Şahhüseynova aid olduğu müəyyənləşib. 33 ildən sonra bizə nəşi təhvil verildi və Sumqayıt Şəhidlər xiyabanında adına layiq şəkildə dəfn etdik. Zaqataladakı həmin ailəyə də baş çəkmək niyyətindəyik. Valideynlərimizin ikisi də beş il əvvəl eyni gündə övladlarının tapılma xəbərini eşitmədən dünyadan köçdülər. Kaş ki, onlar da eşidər, bu dünyadan nigaran getməzdilər. İtkin analarına, doğmalarına səbir-dözüm diləyirəm. Bu, bizim üçün həm kədərli, həm də xoş xəbərdir. Bu gün həm də sevinirik. Bu illər ərzində bizi tək qoymayan, bu gün də şəhidimizin dəfnində iştirak edən hər kəsə təşəkkür edirəm. Prezident İlham Əliyevə, Birinci vitse-prezident Mehriban Əliyevaya və aidiyyəti qurumlara göstərdikləri dəstəyə, niskilimizə son qoyduqlarına görə minnətdarlığımı bildirirəm. Torpaqlarımız azad ediləndə itkinlərimizin tapılacağına ümidimiz yaranmışdı. Bu gün biz öz həsrətimizi sonlandırdıq. Biz qardaşımla, bütün şəhidlərimizlə fəxr edirik. Ümid edirik ki, tezliklə bütün itkin ailələri öz şəhidlərinə qovuşar, gözləri yollardan çəkilər”.
Qeyd edək ki, Birinci Qarabağ müharibəsi şəhidi L.Şahhüseynov 1969-cu il martın 12-də Sumqayıt şəhərində anadan olub. O, 1992-ci il iyunun 28-də Xocavənd rayonunun Qırmızı Bazar qəsəbəsi istiqamətində gedən döyüşlərdə itkin düşüb. L.Şahhüseynov Birinci Qarabağ müharibəsində itkin düşmüş hesab edilən və şəxsiyyətləri müəyyənləşdirilərək bu gün dəfn olunan üç şəhiddən biridir.
Bölmənin digər xəbərləri
