BMT xəbərdarlıq edir: Aclıq qlobal qeyri-sabitliyin davamlı amilinə çevrilir
Bakı, 25 aprel, AZƏRTAC
BMT agentlikləri tərəfindən dəstəklənən böyük beynəlxalq hesabat xəbərdarlıq edir ki, qlobal aclığın artan payı münaqişələrdən əziyyət çəkən kiçik bir qrup ölkələrdə kök salır və kəskin qida təhlükəsizliyi ilə üzləşən insanların üçdə ikisi cəmi 10 ölkədə cəmləşib.
AZƏRTAC təşkilatın məlumatına istinadla xəbər verir ki, BMT agentlikləri, Avropa İttifaqı (Aİ) və tərəfdaşlar tərəfindən cümə günü dərc edilən 2026-cı il üçün “Qida böhranları üzrə qlobal hesabat”da 47 ölkədə 266 milyon insanın 2025-ci ildə yüksək səviyyədə kəskin qida təhlükəsizliyi ilə üzləşdiyi aşkar edilib. Bu, təhlil edilən əhalinin təxminən dörddəbiri və 2016-cı ildə qeydə alınan payın demək olar ki, ikiqatı deməkdir.
Hesabatda kəskin bir mənzərə ortaya çıxır: aclıq artıq bir sıra qısamüddətli fövqəladə hallar deyil, davamlı və getdikcə daha çox yayılan qlobal problemdir. BMT-nin Ərzaq və Kənd Təsərrüfatı Təşkilatının (FAO) baş direktoru Qu Donqyu böhranın müvəqqəti deyil, struktur xarakter daşıdığını bildirib. Onun sözlərinə görə, əsas amil münaqişədir və şiddətli aclıqla üzləşən bütün insanların yarısından çoxu bu bəlaya məruz qalan ölkələrdə cəmləşib.
On ölkə - Əfqanıstan, Banqladeş, Konqo Demokratik Respublikası, Myanma, Nigeriya, Pakistan, Cənubi Sudan, Sudan, Suriya Ərəb Respublikası və Yəmən kəskin aclıqla üzləşən insanların üçdə ikisini təşkil edir. Ən kəskin qida çatışmazlığı 2025-ci ildə Qəzzada və Sudanın bəzi yerlərində olub.
BMT-nin Baş katibi Antonio Quterreş ön sözdə bildirib: ”Bu hesabat hərəkətə keçməyə çağırışdır, həyat qurtaran yardıma investisiyaları sürətlə artırmaq və bu qədər insana əzab verən münaqişələrə son qoymaq istiqamətində çalışmaq üçün siyasi iradəni çağırmaqdır”.
Hesabatda, həmçinin aclığın şiddətinin kəskin şəkildə artdığı vurğulanır. Belə ki, 32 ölkədə 39 milyondan çox insan ərzaq çatışmazlığı ilə üzləşib, fəlakətli aclıq yaşayan insanların sayı isə 2016-cı ildən bəri doqquz dəfə artıb.
Qeyd olunub ki, uşaqlar ən çox təsirlənənlər arasındadır. 2025-ci ildə 35,5 milyona yaxın uşaq kəskin qidalanma çatışmazlığından əziyyət çəkirdi, o cümlədən təxminən 10 milyon uşaq ağır kəskin qidalanma çatışmazlığı ilə üzləşib və bu, ölüm riskini artıran, həyati təhlükə yaradan bir vəziyyətdir.
BMT Uşaq Fondunun (UNICEF) sözçüsü Rikardo Pires xəbərdarlıq edib: “Həmin uşaqlar boylarına görə çox arıqdırlar. Onların immun sistemləri o qədər zəifləyib ki, adi xəstəliklər də ölümcül ola bilər”.
Hesabata görə, məcburi köçkünlük böhranı daha da artırır. Keçən il 85 milyondan çox insan qida böhranı şəraitində evlərindən didərgin düşüb və köçkün əhali ev sahibi icmalara nisbətən daha yüksək səviyyədə aclıqla üzləşir. BMT-nin Qaçqınlar üzrə Ali Komissarı Barham Salih bildirib:, “Məcburi köçkünlük və qida təhlükəsizliyi bir-biri ilə sıx bağlıdır və pis bir sikl əmələ gətirir”.
Gələcəyə baxdıqda, 2026-cı il üçün proqnozlar hələ də qaranlıq olaraq qalır. Davam edən münaqişələr, iqlim şokları və iqtisadi qeyri-sabitliyin bir çox ölkədə ərzaq təhlükəsizliyini kritik səviyyədə saxlayacağı gözlənilir.
Hesabatda, həmçinin qlobal bazar pozuntuları ilə əlaqəli yeni problemlər, o cümlədən Yaxın Şərqdəki davam edən böhranla bağlı risklər qeyd olunur ki, bu da ərzaq qiymətlərini daha da artıra, təchizat zəncirlərini gərginləşdirə bilər. Yardım agentlikləri xəbərdarlıq edir ki, yanaşma dəyişikliyi olmadan dünya dərinləşən böhranlar dövrəsinə qapılmaq riski ilə üzləşəcək, aclıq artıq müvəqqəti fövqəladə hal deyil, qlobal qeyri-sabitliyin getdikcə daha davamlı bir amili olacaq.
“Biz çox gec reaksiya verməkdən erkən hərəkət etməyə və yalnız ərzaq yardımına etibar etməkdən yerli qida istehsalını qorumağa keçməliyik, çünki ehtiyacları azaltmaq, həyatları xilas etmək və zamanla dayanıqlılıq yaratmaq yolu ilə bunu edirik”, - deyə FAO-nun baş direktoru bildirib.
Bölmənin digər xəbərləri
