BMU-da təhsil alan əlcəzairli tələbə: Bu fürsəti qaçırmaq istəmədim
Bakı, 4 iyun, AZƏRTAC
Bakı Mühəndislik Universitetində (BMU) təhsil alan yüzlərlə tələbə arasında fərqli ölkələrdən gələn gənclər də az deyil. Onlardan biri də Əlcəzair Xalq Demokratik Respublikasından olan Safi Omayma Habibdir.
AZƏRTAC xəbər verir ki, Omayma hazırda BMU-da fiziki-kimya ixtisası üzrə magistratura təhsili alır. O, öz seçimində qəti və məqsədyönlüdür. Omaymanın təhsil yolu maraqlı ailə fonu, cəsarətli qərarı və yeni mədəniyyətlərlə tanış olmaq istəyinin nəticəsidir.
Atası Əlcəzairin tanınmış Naama Universitetinin rektorudur. Ailəsi övladının fərqli coğrafiyada, tamam başqa bir təhsil sistemində yolunu davam etdirmək istəyini dəstəkləyir. Safi Omaymanın Azərbaycana olan marağı təkcə ali təhsillə bağlı deyil. O deyir ki, bu marağın kökündə Azərbaycanın tolerant mühiti, Şərqlə Qərbin qovuşduğu mədəniyyətlərarası dəyərləri və dinamik inkişafı dayanır: “Valideynlərim qərarımı tərəddüdsüz dəstəklədilər. Azərbaycanın müxtəlif mədəniyyətlərə hörmətlə yanaşması, beynəlxalq tədbirlərə ev sahibliyi etməsi, eləcə də elm və təhsilə verdiyi önəm bu seçimi mənim üçün daha da məntiqli etdi”.
Omayma Əlcəzairdəki nüfuzlu universitetdə təhsil almaq imkanı olmasına baxmayaraq Azərbaycanda təhsil almaq istəyini belə ifadə edir: “Atamın rəhbərlik etdiyi universitet nüfuzlu olsa da, mən fərqli təhsil sistemi və mədəniyyətlə tanış olmaq istəyirdim. Xaricdə təhsil insanın dünyagörüşünü genişləndirir, müstəqil qərarlar verməyi öyrədir və yeni perspektivlər açır. Bu fürsəti qaçırmaq istəmədim”.
Omayma deyir ki, BMU-nun müasir infrastrukturu, beynəlxalq tərəfdaşlıqları, tələbələrin elmi-tədqiqatla məşğul olmaq imkanları onun gələcək planlarına uyğun gəlir. Gənc tələbə universitetdə yaradılan multikultural mühitdən razılıqla danışır. Müəllimlərin səmimiyyəti, tələbələr arasında mehriban münasibət onun uyğunlaşma prosesini asanlaşdırıb. Deyir ki, dil fərqləri zaman-zaman çətinlik yaradır, lakin həm yerli, həm də xarici tələbələrin bir-birinə dəstəyi bu çətinliyi aradan qaldırır.
BMU-ya qəbul olmamışdan əvvəl Azərbaycana səfər etmiş Omayma ölkəmizlə tanışlığını belə xatırlayır: “Bakının gözəlliyi, Alov qüllələri, Xəzər sahilindəki mənzərə və ən əsası insanların qonaqpərvərliyi məni valeh etdi. Şuşaya da səfər etdim. Azərbaycan əsgərlərinin qəhrəmanlığını eşidərək o torpaqları gəzdim. Şuşanın təbiəti və havası yaddaşımda dərin iz buraxdı”.
Azərbaycan dilinə də maraq göstərən Safi gündəlik istifadə etdiyi sadə ifadələri artıq öyrənib: “Salam”, “Çox sağ ol”, “Necəsən?” kimi bir neçə ifadə öyrənmişəm. Yeni sözlər bilmək ehtiyacı da yaranır ki, onları öyrənmək və yadda saxlamağa çalışıram. Musiqiyə gəlincə, muğam və müasir Azərbaycan pop musiqisini xoşlayıram. Yemək cəhətdən heç bir əziyyət çəkmirəm. Yeməkləriniz əladır, plov, dolma və qutab ən çox sevdiklərimdir”.
Omaymanın təhsilini BMU-da başa vurduqdan sonra planları böyükdür. Magistratura mərhələsindən sonra doktorantura təhsilini də elə burada davam etdirmək niyyətindədir: “BMU mənə həm akademik biliklər, həm də mədəniyyətlərarası uyğunlaşma bacarığı verdi. Gələcəkdə bu təcrübəni elm sahəsində daha da inkişaf etdirmək istəyirəm”.
Bölmənin digər xəbərləri
