DÜNYA
BORİS SPASSKİ BOBBİ FİŞERLƏ BİRLİKDƏ HƏBSXANADA QALMAĞA HAZIRDIR
AZƏRTAC-ın xarici informasiya agentliklərindən aldığı xəbərə görə, şahmat üzrə keçmiş dünya çempionu Boris Spasski ABŞ Prezidenti Corc Buşa məktub göndərərək, ondan iyulun 13-də Tokioda həbsə alınan amerikalı həmkarı Bobbi Fişerə mərhəmət göstərməyi və təqsirindən keçməyi xahiş etmişdir.
Məsələ bundadır ki, indi Fişeri ABŞ-a göndərə bilərlər, burada isə onu həbs cəzası gözləyir.
Qrossmeyster Spasski bildirmişdir ki, əgər rəqibini həbsxanaya salsalar, Amerika ədalət məhkəməsindən onu da Fişerlə birlikdə cəza evinə göndərməyi xahiş edəcəkdir. Çünki 1992-ci ildə Fişer kimi, o da eyni qanun pozuntusuna yol vermişdir: o vaxt Yuqoslaviyaya getmək üzərində qadağaya baxmayaraq, Spasski bu ölkəyə gəlmiş və Fişerlə matç keçirmişdir.
Keçmiş sovet idmançısı demişdir ki, onu da həbsə alsalar, yeganə bir şey – cəza evinə özü ilə şahmat aparmağa icazə verilməsini xahiş edəcəkdir.