Böyük Britaniyada miqrantlarla işləyən şirkət külli miqdarda mənfəət əldə edib
London, 7 oktyabr, AZƏRTAC
Böyük Britaniyada sığınacaq axtaran şəxslərə məskunlaşma xidməti göstərən “Clearsprings Ready Homes” şirkəti dövlətlə bağladığı sərfəli müqavilələrdən sonra 187 milyon funt sterlinqə yaxın mənfəət əldə edib.
AZƏRTAC BBC-yə istinadla xəbər verir ki, buna baxmayaraq “Clearsprings”in bəzi obyektlərində yaşayan sakinlər otaqlarda pis şəraitin, keyfiyyətsiz yeməklərin və gigiyena çatışmazlığının hökm sürdüyünü bildiriblər.
“Clearsprings Ready Homes” Daxili İşlər Nazirliyi ilə 10 illik müqavilə imzalayan üç əsas podratçı şirkətdən biridir. 2019-cu ildə imzalanan bu müqavilələrin ümumi dəyəri əvvəlcə 4,5 milyard funt olaraq planlaşdırılsa da, son hesablamalara görə 15 milyard funta yüksəlib. Hazırkı proqnozlara əsasən, Cənubi İngiltərə və Uelsdə yerləşmə xidmətlərinə cavabdeh olan şirkət bu müddət ərzində 7 milyard funt alacaq.
Yay aylarında bəzi mehmanxanalarda baş verən etirazlar zamanı sığınacaq axtaran şəxslər bildiriblər ki, ictimai narazılıq miqrantlara deyil, “Clearsprings” kimi bu sistemdən mənfəət qazanan şirkətlərə yönəlməlidir. Bu şirkətlərlə imzalanmış müqavilələr parlament üzvləri tərəfindən də tənqid olunur.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
