London, 5 avqust, AZƏRTAC

Böyük Britaniyanın müxtəlif şəhərlərində radikal sağçıların keçirdiyi aksiyalar davam edir.

AZƏRTAC xəbər verir ki, bu dəfə 700-ə yaxın etirazçı Roterem şəhərindəki “Holiday Inn Express” otelinin qarşısında aksiya keçirib. Onlar Britaniyada sığınacaq axtaran miqrantların qaldığı otelin qarşısında yanğın törədib, pəncərələrin şüşələrini sındırıb və binanın içərisinə soxula biliblər. Cənubi Yorkşir polisi qarşıdurmada azı on polis əməkdaşının yaralandığını bildirib.

Baş nazir Kir Starmer ölkə daxilində davam edən iğtişaşlardan sonra xalqa müraciət edib. O deyib ki, "quldurları ədalətə təslim etmək üçün nə lazımdırsa" edəcək. Starmer aksiya iştirakçılarının əməllərinə görə peşman olacaqlarını da əlavə edib.

Britaniyanın müxtəlif şəhərlərində keçirilən aksiyalarda indiyədək 147 nəfər saxlanılıb.

Qeyd edək ki, iyulun 29-da Sautport şəhərində 17 yaşlı bıçaqlı şəxs şəhərdəki rəqs məktəblərinin birində uşaqlara hücum edib. Nəticədə 9 uşaq yaralanıb, 3 uşaq isə aldığı xəsarətlərdən xəstəxanada həyatını itirib. Hadisəni törədən yeniyetmənin miqrant olması barəsində sosial mediada xəbərlərin yayılmasından sonra Britaniyada radikal sağçı qruplar aksiyalara başlayıblar.

Aytən Abbaslı

AZƏRTAC-ın xüsusi müxbiri

London