Britaniyanın maliyyə naziri: “Brexit” ölkə iqtisadiyyatına zərər vurub
London, 20 oktyabr, AZƏRTAC
Böyük Britaniyanın maliyyə naziri Reyçel Rivz Beynəlxalq Valyuta Fondunun (BVF) yüksək səviyyəli iqtisadi komitəsində çıxışı zamanı 2020-ci ildə əldə olunan “Brexit” sazişinin ölkə iqtisadiyyatına uzunmüddətli mənfi təsir göstərdiyini bildirib.
AZƏRTAC BBC-yə istinadla xəbər verir ki, R. Rivz dünyanın aparıcı maliyyə nazirləri və mərkəzi bank rəhbərlərinə müraciət edib.
O bildirib ki, Böyük Britaniyanın məhsuldarlıq problemi ölkənin Avropa İttifaqından çıxma tərzi ilə daha da dərinləşib. Nazir Büdcə Məsuliyyəti Ofisinin hesablamalarına istinad edərək bildirib ki, “Brexit” razılaşması nəticəsində Böyük Britaniyanın iqtisadiyyatı uzunmüddətli perspektivdə Avropa İttifaqında qalacağı halda mümkün səviyyədən təxminən 4 faiz aşağı olacaq.
“Biz bunu etiraf edir və ticarət əlaqələrimizi gücləndirməyə çalışırıq”, - deyə Rivz qeyd edib.
Əvvəllər Leyboristlər hökuməti “Brexit”in iqtisadiyyata mənfi nəticələrini açıq şəkildə vurğulamaqdan çəkinirdi. Lakin son aylarda nazirlər bu mövzuda daha sərt və açıq bəyanatlar səsləndirirlər.
Ekspertlər bildirirlər ki, bu mövzu 26 noyabrda təqdim olunacaq dövlət büdcəsindən öncə hökumətin əsas arqumentlərindən birinə çevriləcək. Yeni büdcə tədbirlərinin, xüsusilə vergi artımlarının əsas səbəblərindən biri kimi Böyük Britaniyanın uzunmüddətli məhsuldarlığının azalması göstəriləcək.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
