Bu il Balakənin xurma bağlarından 15,7 min tondan çox məhsul yığılıb
Balakən, 26 dekabr, Mustafa Dadaşov, AZƏRTAC
Balakən rayonu xurma istehsalına görə respublikada qabaqcıl yerlərdən birini tutur. Hazırda rayonda mövcud xurma bağlarının ümumi sahəsi 764,5 hektardır. Bu il rayonda 15 min 737 ton xurma istehsal olunub. Məhsul istehsalı əvvəlki illə müqayisədə 57 ton artıb. Hər hektar xurma bağından orta hesabla 205,8 sentner məhsul götürülüb.
Bu barədə AZƏRTAC-ın bölgə müxbirinə Balakən Rayon Statistika İdarəsindən məlumat verilib.
Qeyd edək ki, Balakəndə kənd təsərrüfatının ixrac potensialı yüksək sahələrindən olan xurma istehsalına maraq ildən-ilə artır. Son illər rayonda özəl sərmayələr hesabına xurmanın qurudulmuş formada istehsalı ilə məşğul olan "Balxurma" müəssisəsi yaradılıb. İllik istehsal gücü 2 min ton olan bu müəssisədə istehsal üçün meyvələr əsasən rayon sakinlərinin fərdi təsərrüfatlarından yığılır. Müəssisədə istehsal olunan tam gigiyenik və ekoloji cəhətdən təmiz xurma məhsulları daxili bazarlarda satılmaqla yanaşı, xarici bazarlara da ixrac edilir.
Bölmənin digər xəbərləri
