Buraxılış vəsiqəsi almayan daşıyıcılar beynəlxalq yük daşımalarında iştirak edə bilməyəcəklər
Bakı, 24 fevral, AZƏRTAC
Rəqəmsal İnkişaf və Nəqliyyat Nazirliyi və Azərbaycan Yerüstü Nəqliyyat Agentliyinin (AYNA) təşkilatçılığı ilə avtomobil nəqliyyatı ilə beynəlxalq yük daşımaları həyata keçirən daşıyıcılarla növbəti görüş keçirilib.
AYNA-dan AZƏRTAC-a bildirilib ki, tədbirdə çıxış edən rəqəmsal inkişaf və nəqliyyat nazirinin müavini Rəhman Hümmətov son bir ildə daşıyıcıların sayının artmasının, daşımalarda istifadə edilən nəqliyyat vasitələri parkının genişlənməsinin, eləcə də Azərbaycan daşıyıcılarının müvafiq bazar paylarının artmasının müşahidə edildiyini diqqətə çatdırıb. Nazir müavini qeyd edib ki, hələ iki il bundan əvvəl beynəlxalq yükdaşımada istifadə olunan nəqliyyat vasitələrinin sayı 3 mindən az olub, 2022-ci ildə isə bu say 8 mini ötüb. Nəqliyyat vasitələrinin sayında artım bazarın şəffaflaşması nəticəsində “kölgə”də fəaliyyət göstərən daşıyıcıların qeydiyyata alınması, fəaliyyəti olmayan daşıyıcıların fəaliyyətini bərpa etməsi, bəzilərinin daxili bazardan beynəlxalq bazara keçidi və idxal olunan nəqliyyat vasitələrinin hesabına yaranıb. Görülmüş tədbirlər nəticəsində son dövrdə Azərbaycan daşıyıcılarının ikitərəfli daşımaların bütün istiqamətlər üzrə bazar payları artıb, milli daşıyıcıların 3-cü ölkələrin daşımalarında iştirakı ciddi şəkildə genişlənib.
Vurğulanıb ki, Nazirlər Kabinetinin 2022-ci il aprelin 8-də təsdiqlədiyi “Avtomobil nəqliyyatı ilə beynəlxalq sərnişin və yük daşımalarına buraxılış Qaydaları” bu ilin aprelin 8-də qüvvəyə minəcək. Qaydalara əsasən, avtomobil nəqliyyatı ilə beynəlxalq sərnişin və yük daşımaları fəaliyyəti göstərən daşıyıcılar işgüzar nüfuza, maliyyə vəziyyəti və peşəkarlıq səriştəsi ilə bağlı meyarlara, operatorun sürücülərinin hazırlıq səviyyəsinə dair tələblərə cavab verməlidir.
Bildirilib ki, buraxılış qaydalarının tətbiqində məqsəd avtomobil nəqliyyatı ilə daşımalar sahəsində sahibkarlığın stimullaşdırılması, milli daşıyıcıların beynəlxalq daşımalar bazarında rəqabət qabiliyyətinin artırılması, daha peşəkar və beynəlxalq tələblərə cavab verən sürücülərin hazırlanmasıdır.
Rəhman Hümmətov qeyd edib ki, hazırda 218 şirkətdən yalnız 84-nün təqdim etdiyi sənədlər buraxılış qaydalarının şərtlərinə uyğundur. Bu şirkətlərin avtonəqliyyat vasitələrinin sayı ümumi parkın cəmi 16 faizini təşkil edir.
“AYNA-da daşıyıcıların iştirakı ilə çoxsaylı maarifləndirici görüşlər keçirilib və buraxılış qaydaları haqqında zəruri məlumatlar təqdim olunub. AYNA-nın Təlim-Tədris Mərkəzi, Azərbaycan Beynəlxalq Avtomobil Daşıyıcıları Assosiasiyası (ABADA) və tərəfdaş şirkətlər sürücülərin peşəkarlıq səriştəsinə dair təlimlər keçirir. Bu günədək təlimlərdə 4 mindən çox sürücü iştirak edib. Ümumilikdə isə 8 mindən çox sürücünün tədris prosesinə cəlb edilməsi nəzərdə tutulur”, - deyə Rəhman Hümmətov əlavə edib.
Tədbirdə sənədləri buraxılış qaydalarının şərtlərinə uyğun olan daşıyıcıya ilk “Avtomobil nəqliyyatı ilə beynəlxalq daşımalara buraxılış vəsiqəsi”ni təqdim edildi.
Daha sonra “Avtomobil nəqliyyatı ilə beynəlxalq sərnişin və yük daşımalarına buraxılış Qaydaları”na dair daşıyıcıların sualları cavablandırılıb.
Qeyd edək ki, qaydalara əsasən, buraxılış vəsiqəsi və kartı almayan daşıyıcılar aprelin 8-dən beynəlxalq yük daşımalarında iştirak edə bilməyəcək, hüquqi və fiziki şəxslər “İcazə” blanklarının bölgüsünə buraxılmayacaqlar. “İcazə” blanklarının bölgüsü buraxılış kartı verilmiş avtonəqliyyat vasitələrinin sayına uyğun aparılacaq. Gömrük keçid məntəqələrindən keçən avtonəqliyyat vasitələrinə müvafiq qeydiyyat sistemi vasitəsilə nəzarət olunacaq. Buraxılış kartı verilməyən avtonəqliyyat vasitələrinə “İcazə” blankının verilməsi aşkar olunduqda daşıyıcı bölgüdən kənarlaşdırılacaq.
Sonda daşıyıcıların diqqətinə bir daha çatdırılıb ki, buraxılış vəsiqəsi və kartının alınması üçün çox az vaxt qalıb. Sənədlərini təqdim etməyən daşıyıcıların sayı isə kifayət qədər çoxdur.
Bölmənin digər xəbərləri
