Bürünc səviyyəli hakim sertifikatı alan azərbaycanlı: İmtahandan uğurla keçəcəyimə inanırdım
Bakı, 17 yanvar, AZƏRTAC
Ötən ilin oktyabr ayında Dünya Atletikası (World Athletics) tərəfindən idman yerişi üzrə beynəlxalq səviyyəli hakim adını almaq üçün Azərbaycan Atletika Federasiyasına sorğu gəlmişdi. Qurum da namizəd olaraq mənim adımı təqdim etmişdi.
Bu sözləri AZƏRTAC-a açıqlamasında Dünya Atletikası (World Athletics) tərəfindən idman yerişi üzrə beynəlxalq bürünc səviyyəli hakim sertifikatı ilə təltif edilən Namiq Əsədov deyib.
O, əvvəlcə imtahanda iştirak edəcək şəxslərə ikigünlük onlayn kursun keçirildiyini bildirib: “Birinci gün qaydalar izah edildi. İkinci gün isə idman yerişindəki buraxılan səhvlər barədə məlumat verildi. Bir müddət sonra isə imtahan baş tutdu. Məqsədim Azərbaycanda beynəlxalq səviyyəli referilər arasında mənim də adımın olması idi. Çətin suallar olsa da, çəkinmədim. Ciddi hazırlaşdığım üçün imtahandan uğurla keçəcəyimə inanırdım”.
N.Əsədov hansı yarışlara təyinat alacağı barədə məlumatının olmadığını söyləyib: “Adətən yarışlara bir ay qalmış bizə məlumat verirlər. Mən 2012-ci ildən AAF-də hakim kimi işləyirəm. Müxtəlif beynəlxalq turnirlərə təyinat almışam və hətta respublika dərəcəli hakim adını qazanmışam. Məqsədim daha böyük nailiyyətlər əldə etməkdir”.
Qeyd edək ki, Namiq Əsədov Qaçış Hər Kəs üçün Komitəsinin sədri vəzifəsində çalışır.
Bölmənin digər xəbərləri
