Buxarest Sazişi uzunmüddətli əməkdaşlıq üçün təməl yaradır
Bakı, 19 dekabr, AZƏRTAC
Artıq dünya ölkələri yaşıl iqtisadiyyata keçid mərhələsindədir. Xüsusilə Rusiya-Ukrayna müharibəsi dünya bazarında çox güclü dəyişiklikləri şərtləndirdi. Dövlətlər dağılmış köhnə iqtisadi münasibətləri yeni tərəfdaşlarla modern dövrün tələblərinə uyğun olaraq qurur. Bu tərəfdaşlardan biri də Azərbaycan oldu. Rusiyanın beynəlxalq tərəfdaşlarına olan təhdidi yeni münasibətləri yaratdı. Azərbaycanın uzaqgörən xarici siyasəti və əlverişli strateji mövqeyi, həmçinin təbii resursları dövlətimizi Avropada arzu olunan tərəfdaşa çevirdi. Təbii ki, əlverişli mövqe və malik olduğu təbii sərvətlər ağıllıcasına qurulmuş xarici əlaqələr olmayınca bir heçə çevrilir. Bu gün əgər Azərbaycan dünyada iqtisadi əlaqələrin qurulmasında iştirakçı kimi çıxış edirsə bu Prezident İlham Əliyevin məharətidir.
Bu sözləri AZƏRTAC-a açıqlamasında Milli Məclisin deputatı Müşfiq Cəfərov söyləyib.
“2021-2027-ci illərdə dünyada yeni infrastruktur layihələrinin reallaşması nəzərdə tutulur ki, dövlətimiz məhz bu aparıcı layihələrin əsas tərəfdaşlarındandır. Bunlardan biri də dekabrın 17-də Buxarestdə Azərbaycan, Gürcüstan, Rumıniya, Macarıstan rəhbərlərinin və Avropa İttifaqı komissarlarının iştirakı ilə Qara dənizin dibindən elektrik enerjisi və rəqəmsal rabitə kabelinin çəkilməsi haqqında imzalanan memorandumdur. Layihə Azərbaycanda istehsal olunacaq yaşıl enerjinin elektrik xətti ilə Gürcüstana, oradan Rumıniyaya, ardınca isə Macarıstana ixrac etməsini nəzərdə tutur. Bu sənəd təkcə elektrik enerjisi sahəsində əməkdaşlığı deyil, həmçinin qeyd olunan ölkələr arasında bir sıra mühüm sahələrdə uzunmüddətli əməkdaşlıq üçün təməl yaradır. Prezidentlər açıqlamalarında növbəti mərhələdə sualtı elektrik enerjisi xətti boyunca rəqəmsal xətt çəkməyi hədəfə aldıqlarını da qeyd ediblər. Bununla da Azərbaycan bu ölkələrlə yanaşı, Mərkəzi Asiya ilə də iqtisadi bağlılığını artıracaq. Saziş Avropa İttifaqını Cənubi Qafqazdakı tərəfdaşlarına daha da yaxınlaşdıracaq və müttəfiq ölkələrdə təmiz enerjiyə keçidə nail olmağa kömək edəcək”, - deyən deputat vurğulayıb ki, ölkəmizdə istehsal olunacaq yaşıl enerjinin idxalı üçün bir neçə qlobal şirkətlə anlaşma sənədləri imzalanıb.
Bölmənin digər xəbərləri
