Buzovna çimərliyində təmizlik aksiyası keçirilmişdir
Bakı, 30 sentyabr (AZƏRTAC). Heydər Əliyev Fondunun təşəbbüsü ilə “Beynəlxalq Xəzər həftəsi” çərçivəsində “Təmiz Şəhər” ASC tərəfindən növbəti iməcilik aksiyası keçirilmişdir.
“Təmiz Şəhər” ASC ənənəvi olaraq ildə 2 dəfə - çimərlik mövsümündən əvvəl və sonra təmizlik aksiyaları təşkil edir.
ASC-nin mətbuat xidmətindən AZƏRTAC-a bildirmişlər ki, “Təmizlik naminə!” şüarı altında keçirilən budəfəki aksiya çərçivəsində Buzovna çimərliyinin sahili müxtəlif tullantılardan təmizlənmişdir.
Aksiyanın əsas məqsədi ictimaiyyətin diqqətini çimərliklərin zibillənməsi probleminə cəlb etmək və təbiətə ziyanın mümkün qədər azaldılmasıdır.
İməciliyə 150-yə yaxın könüllü qoşularaq çimərliyi plastik qablardan, kağız, karton və digər məişət tullantılarından təmizləməklə ətraf mühitin mühafizəsi işinə töhfəsini vermişdir.
Buzovna çimərliyinin təmizlənməsi nəticəsində toplanmış tullantılar Balaxanı şəhər tullantılarının çeşidlənməsi zavoduna təhvil verilmişdir.
Bölmənin digər xəbərləri
