Canni De Byazi: Avstriya ilə oyunda yaxşı nəticə üçün çalışacağıq
Bakı, 15 oktyabr, AZƏRTAC
Rəqib güclü komandadır, bizi çətin oyun gözləyir.
AZƏRTAC xəbər verir ki, bu sözləri futbol üzrə Azərbaycan milli komandasının baş məşqçisi Canni De Byazi “Avro 2024”ün seçmə mərhələsində evdə Avstriya yığmasına qarşı keçiriləcək oyundan əvvəl mətbuat konfransında deyib.
Mütəxəssis bildirib: “Rəqibi yaxşı analiz etmişik. Onlar modern futbol oynayırlar. Avstriyanın bir neçə əsas oyunçusu bu matçda meydanda olmayacaq. Buna baxmayaraq, yenə də güclü komandadır. Onların Belçikaya məğlubiyyəti aldadıcı ola bilər. Bu rəqiblə səfərdəki qarşılaşmada fərqli nəticə gözləyirdim, amma 1:4 uduzduq. Son 14 matçda 7 qələbə qazanmışıq. Biz də komanda kimi inkişaf edirik. Sabah da yaxşı nəticə üçün çalışacağıq”.
Qeyd edək ki, oktyabrın 16-da Tofiq Bəhramov adına Respublika stadionunda keçiriləcək Azərbaycan-Avstriya matçı saat 20:00-da başlayacaq.
Bölmənin digər xəbərləri
