Cəlilabadda örtük altında çiyələk əkininə başlanılıb FOTO VİDEO
Cəlilabad, 14 oktyabr, İlkin Adıyev, AZƏRTAC
Cəlilabad rayonunda yetişdirilən çiyələyin xarici bazarlara çıxarılma perspektivləri çox olduğundan fermerlər bu sahəyə xüsusi maraq göstərirlər.
AZƏRTAC-ın bölgə müxbiri xəbər verir ki, artıq bir neçə gündür yeni salınan çiyələk sahələrində növbəli şitillərin açıq sahələrə köçürülməsinə başlanılıb. Son günlər havalar əkin üçün əlverişsiz keçsə də, fermerlər günəşli havalarda bu prosesi tez bir zamanda başa çatdırmaq niyyətindədirlər. İndi onların əsas qayğıları payız əkini kampaniyasını vaxtında və qaydalara uyğun başa çatdırmaqdır. Bu məqsədlə əkin kampaniyasına kifayət qədər işçi qüvvəsi cəlb edilib.
Fermerlər ötən mövsümün məhsuldarlığından razı qalıblar. Onun üçün bu mövsüm də bol məhsul götürəcəklərinə əmindirlər.
Ötən il 4 hektar sahədə əkin aparan cəlilabadlı fermer Əmrah Musayev bu il 5 hektarda çiyələk əkir. O, əvvəlki illərdən fərqli olaraq əkini yeni üsulla apardıqlarını, xarici bazarın tələbatına uyğun sortları əkində tətbiq etdiyini bildirir: “Hazırda təsərrüfatımızda istixana şəraitində əkin aparılır. Bu il əkin prosesində “Murano” növünə üstünlük vermişik. Bunun da səbəbi bu çiyələyin daha şirin olması və uzaq məsafələrə daşınma üçün sərfəli olmasıdır. Son zamanlar havaların qeyri-sabit keçməsi bir sıra çətinliklərlə yanaşı, əkin prosesini də bir qədər gecikdirdi. Amma buna baxmayaraq, əkini yekunlaşdırmaq üzrəyik”.
Cəlilabad Rayon Dövlət Aqrar İnkişaf Mərkəzinin bitkiçilik sektorunun müdiri Mübariz Nadirov da xarici bazarlara çıxarıldığı üçün çiyələyin ildən-ilə fermerlərə daha çox xeyir gətirdiyini söyləyir: “Bu il çiyələk əkininin keçən ilə nisbətən daha çox əkin sahəsində aparılması gözlənilir. Bu günə qədər rayonda 505 hektar sahədə çiyələk əkilib. Hazırda yeni əkin sahələrinin artırılması istiqamətində işlər davam edir. Bu il isə 600 hektardan çox sahədə əkin aparılacağı təxmin edilir”.
Qeyd edək ki, cəlilabadlı fermerlər payızlıq çiyələk əkini kampaniyasını oktyabrın sonuna qədər başa çatdırmağı planlaşdırırlar.
Bölmənin digər xəbərləri
