CENEVRƏDƏ BMT-NİN İNSAN HÜQUQLARI ŞURASININ İKİNCİ SESSİYASI AÇILMIŞDIR

18.09.2006 [22:00]
Çap et
A⁺ A^-

AZƏRTAC İTAR-TASS-a istinadla xəbər verir ki, sentyabrın 18-də Cenevrənin Millətlər sarayında BMT-nin İnsan Hüquqları Şurasının ikinci sessiyası açılmışdır. Gündəliyə Fələstin ərazilərində, Livan, Kuba, Somali və Koreya Xalq Demokratik Respublikasında insan hüquqlarının təmin edilməsi sahəsində vəziyyət haqqında məruzələrin müzakirəsi, habelə irqçiliklə, dini dözümsüzlük təzahürləri ilə mübarizə, söz azadlığının təmin olunması məsələləri daxildir.

İnsan Hüquqları Şurası bu ilin martında BMT Baş Məclisinin qərarı ilə yaradılmışdır. O, BMT-nin eyni adlı komissiyasını əvəz etmişdir. Belə ki, bu komissiya həddindən artıq siyasiləşdiyinə və ikili standartlara görə daim tənqid olunurdu. Yeni qurumun ilk sessiyası iyunun 19-30-da Cenevrədə keçirilmiş və əsasən, təşkilati məsələlərə həsr edilmişdi. Sonra onun Qəzzə bölməsində və Livanda vəziyyətə həsr olunmuş iki növbədənkənar iclası keçirilmişdir.

Xatırladaq ki, İnsan Hüquqları Şurasının tərkibinə 47 dövlət, o cümlədən Azərbaycan, Ukrayna və Rusiya daxildirlər.