CENEVRƏDƏ NƏQLİYYATLA BAĞLI GÖMRÜK MƏSƏLƏLƏRİ MÜZAKİRƏ EDİLMİŞDİR
Cenevrədə Birləşmiş Millətlər Təşkilatının Avropa üzrə İqtisadi Komissiyasının nəqliyyatla bağlı gömrük məsələləri üzrə İşçi Qrupunun 104-cü sessiyası başa çatmışdır. Sessiyada Dövlət Gömrük Komitəsinin Gömrük Nəzarətinin Təşkili Baş İdarəsinin rəisi, gömrük xidməti polkovniki Şahin Bağırov iştirak etmişdir. O, AZƏRTAC-ın müxbirinə demişdir ki, sessiyada Avropa dövlətləri gömrük orqanlarının, nəqliyyat təşkilatlarının və onların fəaliyyətini tənzimləyən dövlət qurumlarının nümayəndələri iştirak edirdilər. Sessiyada Avropa üzrə İqtisadi Komissiyanın və BMT-nin digər orqanlarının fəaliyyəti, fərdi daşıma vasitələrinin müvəqqəti idxalına dair gömrük Konvensiyası, sərhədlərdə yüklər üzərində nəzarətin razılaşdırılmış şərtləri haqqında beynəlxalq Konvensiya (1982-ci il), beynəlxalq yükdaşıma kitabçalarından istifadə etməklə daşımalar üzrə gömrük Konvensiyası,qaçaqmalçılıq məqsədi ilə gömrük tranzit sistemlərindən sui-istifadələrin qarşısının alınması məsələləri müzakirə olunmuşdur. Nümayəndə heyətləri müzakirələrdə öz ölkələrinin mövqeyini açıqlamışlar. Müzakirələrin nəticələrinə dair yekun qərar bu ilin sentyabrında keçiriləcək növbəti görüşdə qəbul ediləcəkdir.
Bölmənin digər xəbərləri
