Cənubi Koreya kəşfiyyatı Kim Çen Inın arıqlaması barədə məlumatları şərh edib
Bakı, 8 iyul, AZƏRTAC
KXDR lideri Kim Çen Inın son yarım ildə 10-20 kiloqram arıqlaması çox güman ki, pəhrizlə bağlıdır.
AZƏRTAC “Çunan ilbo” qəzetinə istinadla xəbər verir ki, bu barədə Koreya Respublikası parlamentinin deputatı Kim Byon Gi Cənubi Koreya kəşfiyyatının məlumatlarına əsaslanaraq bildirib.
“Kim Çen In ilin əvvəlindən bəri təxminən 10-20 kiloqram arıqlayıb. Bunun xəstəliklə deyil, sadəcə, pəhrizlə bağlı olduğunu düşünürük. O, sağlamdır”, - deputat belə deyib.
İyulun 8-də Koreya Respublikasının Kəşfiyyat Xidmətinin əməkdaşları parlamentin deputatları ilə görüşüblər. Kəşfiyyat nümayəndələri deyiblər ki, onlar Kim Çen Inın sağlam olduğuna əmindirlər. Çünki KXDR liderinin adətən müalicə aldığı klinikaya xarici dərmanların idxalına dair dəlillər aşkarlanmayıb. Seul, həmçinin son vaxtlar Şimali Koreya liderinin aktiv fəaliyyətini də qeyd edib.
Cənubi Koreya kəşfiyyatına görə, 2020-ci ilin sonunda Kim Çen Inın çəkisi təxminən 140 kiloqrama bərabər idi.
Bu il iyun ayının əvvəlində Amerikanın NK News internet portalı Kim Çen Inın ictimaiyyətə açıq foto və videolarını analiz edərək onun son aylarda çox arıqladığı qənaətinə gəlmişdi.
Bölmənin digər xəbərləri
