Pekin, 4 mart, AZƏRTAC

Cənubi Koreyada hökumətin ali məktəblərdə tibb ixtisasları üzrə qəbul kvotasını artırmaq planına etiraz edərək işə çıxmayan, bununla da ölkənin səhiyyə sektorunda xaosa səbəb olan təxminən 7 min həkim-internanın sertifikatının ləğv edilməsi prosesinə başlanılıb.

AZƏRTAC Yonhap agentliyinə istinadla xəbər verir ki, bu barədə məlumatı Cənubi Koreyanın səhiyyə nazirinin müavini Park Min-soo açıqlayıb. Hökumətin martın 1-dək aksiyanı dayandırıb işə çıxmaq barədə əmrinə tabe olmayan stajor həkimlərin sertifikatının ləğv olunacağını deyən nazir müavini əlavə edib ki, cəza tədbirləri geri dönməz xarakter daşıyır və həkim-internaların gələcək karyerasına ciddi təsir edəcək. Park Min-soo ölkənin səhiyyə sektorunda xaosa səbəb olan qanunsuz kollektiv aksiyanın əsas təşkilatçılarının müəyyən edilməsi və cəzalandırılması üçün təhqiqata başlandığını deyib.

Qeyd edək ki, Cənubi Koreyada 9 minə yaxın həkim-interna və rezident həkim hökumətin universitetlərin tibb ixtisaslarına qəbul kvotasını artırmaq planına etiraz olaraq 14 gündür işə çıxmır. Tətil edən həkim-internaların böyük hissəsi akademik məzuniyyət və ya işdən çıxmaq üçün ərizə yazıb. Stajorlar hökumətin 2025-ci ildən universitetlərdə tibb təhsili üçün kvotanı 2 min yer artırmaq planına etiraz edirlər. Hazırkı limit bütün ölkə üçün 3058 yerdir.

Aksiya Koreya Respublikasının səhiyyə sektorunda ciddi böhran yaradıb. Paytaxt Seul da daxil olmaqla, bir neçə şəhərdəki tibb müəssisələrində əhaliyə göstərilən xidmətlərdə ləngimələr yaranıb, cərrahi əməliyyatların təxminən yarısı təxirə salınıb.

Şahin Cəfərov

AZƏRTAC-ın xüsusi müxbiri

Pekin